Nyuma yo gutsinda ikipe ya Rayon Sports igitego 1-0 mu mukino w’umunsi wa 30 wa shampiyona, ikipe ya Kiyovu Sports yizihije Isabukuru y’imyaka 60 imaze ivutse mu byishimo byinshi.
Kuri uyu wa Gatandatu ni bwo habaye imikino isoza shampiyona y’uyu mwaka w’imikino 2023-2024.
Ikipe ya Kiyovu Sports yizihizaga Isabukuru y’imyaka 60 imaze ibayeho, yari yakiriye mukeba wa yo, Rayon Sports n’ubwo bamwe batacyemera ko aya makipe ari amakeba.
Urucaca rwaryohewe n’uyu munsi kuko rwatsinze ikipe yo mu Nzove igitego 1-0 cyatsindishijwe umutwe na Alfred Leku ku munota wa 78, ku mupira mwiza yari ahawe na Nizigiyimana Karim Mackenzi.
Ibi byasobanuraga ko iyi kipe yo ku Mumena ihaye impano nziza abakunzi ba yo, kuko yasoje byibura itsinda Rayon Sports n’ubwo izi kipe zombi zitagize umwaka mwiza.
Gusa mbere y’uyu mukino, abakiniye iyi kipe barimo Munyaneza Ashraf uzwi nka Kadubiri, Munyemena Nuru, Kanyandekwe Hussein uzwi nka Hussein 10 n’abandi, bari babanje gusura abakinnyi mu mwiherero babibutsa agaciro ko gutsinda umukino wa Rayon Sports ku munsi nk’uyu.
Nyuma y’umukino, ibyishimo byari byinshi mu bakunzi b’Urucaca n’ubwo rwasoreje shampiyona ku mwanya wa Gatandatu n’amanota 44, mu gihe Rayon Sports yasoreje ku mwanya wa Kabiri n’amanota 57.
UMUSEKE.RW
