Mu irushanwa rya “Pre-Season Agaciro Tournament”, riri kugana ku musozo, ikipe ya Gatoto FC itozwa n’Umunyamakuru wa Radio10, Mucyo Antha, yatsinze Golden Generation ibitego 2-1 ihita igera ku mukino wa nyuma.
Umukino wa mbere wa 1/2 mu irushanwa rya “Pre-Season Agaciro Tournament”, wabaye ku Cyumweru tariki ya 16 Kamena, ubera kuri Stade Mumena.
Ikipe ya Gatoto FC yari yiganjemo abakinnyi bo mu Cyiciro cya Mbere, yatsinze Golden Generation FC yiganjemo abato, ibitego 2-1.
Iyi ntsinzi, yatumye iyi kipe itozwa na Mucyo Antha, igera ku mukino wa nyuma ku nshuro ya Kabiri yikurikiranya nyuma kwegukana igikombe umwaka ushize.
Undi mukino wa 1/2, uraba kuri uyu wa Mbere Saa Kumi z’amanywa kuri Stade Mumena.
Ikipe ya Brésil & Friends na Pogba Foundation, zirishakamo izakina na Gatoto ku mukino wa nyuma.
Irushanwa rya “Pre-Season Agaciro Tournament”, risanzwe rifasha abakinnyi kuguma ku rwego rwiza no kwigaragaza ku baba bashaka akazi.
UMUSEKE.RW
