Real Madrid yatsindiwe na Lille mu Bufaransa igitego 1-0, Bayern Munich na yo itsindirwa i Villa Park igitego 1-0, mu mikino y’Umunsi wa Kabiri w’’Irushanwa rihuza amakipe yabaye aya mbere iwayo i Burayi (UEFA Champions League) yabaye ku wa Kane.
Igitego cya rutahizamu w’Umunya-Canada, Jonathan David, yatsinze mu mpera z’igice cya mbere cy’umukino ni cyo cyabaye ikinyuranyo. Ni igitego cyavuye kuri penaliti umusifuzi yatanze amaze kureba kuri VAR, agasanga Eduardo Camavinga yagaruje umupira ukuboko nyuma ya coup franc Lille yari iteye.
Jonathan David uherutse gutsinda hat-trick mu mpera z’icyumweru yahise atera neza penaliti, umunyezamu Andriy Lunin wari wasimbuye Thibaut Courtois wavunitse, ntiyamenya uko bigenze.
Kylian Mbappé ukirutse imvune yagiye mu kibuga ku munota wa 57, ariko nta cyo yigeze afasha ikipe ye mu kwikura imbere y’iyi kipe yambara umukara n’umutuku.
Iyi ni yo ntsinzwi ya mbere Real Madrid igize muri iri rushanwa nyuma yo kunyagirwa na Manchester City ibitego 4-0, mu mukino wo kwishyura wa 1/2 wabaye mu 2023.
Umunya-Brézil, Endrick, yabaye umukinnyi muto kurusha abandi muri Real Madrid uyikiniye muri iri rushanwa. Abikoze ku myaka 18 n’iminsi 73, aca kuri Raúl González wabigezeho ku myaka 18 n’iminsi 78 ubwo bakinaga na Ajax mu 1995.
Umutoza wa Liverpool, Arne Slot na we yasogongeye ku mukino wa mbere w’iri rushanwa akinira mu rugo, Anfield, aho yanahatsindiye Bologna ibitego 2-0. Ni ibitego byatsinzwe na Alexis Mac Allister na Mohamed Salah.
John Duran wagiye mu kibuga asimbuye yafashije Aston Villa gutsindira mu rugo, i Villa Park, Bayern Munich igitego 1-0.
Ku munota wa 79 w’umukino, ni bwo umutoza Unai Emery yashyize mu kibuga uyu musore ukiri muto ukomoka muri Colombia. Uyu musore ukunda gutsinda asimbuye, yongeye kubikora ubwo yateraga umupira n’imoso, muri metero nka 25, umunyezamu Manuel Nueur ntiyamenya uko bigenze.
- Advertisement -
N’ubwo umunyezamu wayo, Michele Di Gregorio, yahawe ikarita itukura ku munota wa 59, ntibyabujije Juventus gutsindira Leipzig iwayo ibitego 3-2.
Umunya-Slovénie, Benjamin Sesko, ni we watsinze ibitego byombi bya Leipzig, mu gihe Umunya-Serbie, Dusan Vlahovic na we yatsindiye Juventus ibitego bibiri mbere y’uko Francisco Conceição ashimangira intsinzi ku munota wa 82.
Indi mikino yabaye!
Atalanta yatsinze Shakhtar Donetsk yo muri Ukraine ibitego 3-0. Berat Djimsiti, Ademola Lookman na Raoul Bellanova ni bo batsindiye Atalanta muri uyu mukino wabereye kuri Stade ya Shalke iri mu mujyi wa Gelsenkirchen mu Budage, aho iyi kipe yakirira imikino mpuzamahanga kuva intambara y’u Burusiya na Ukraine yatangira.
Girona iri gukina iyi mikino ku nshuro ya mbere yatsindiwe mu rugo na Feyenoord ibitego 3-2.
Kerem Akturkoglu, veteran Ángel Di Maria, Alexander Bah na Orkun Kokcu bafashije Benfica Lisbon kunyagira Atletico Madrid ibitego 4-0; Monaco inganya na Dinamo Zagreb ibitego 2-2.
Mu wundi mukino wabaye, Sturm Graz yatsindiwe mu rugo na Club Brugge igitego 1-0.
ISHIMWE YARAKOZE SETH KEFA/UMUSEKE.RW
