Ubuyobozi bushinzwe Siporo muri Polisi y’u Rwanda, bwerekanye abakinnyi bashya bazifashishwa muri Police Women Volleyball Club na Police Volleyball Club mu mwaka w’imikino 2024-25.
Mbere y’uko shampiyona y’Icyiciro cya mbere ya Volleyball mu Bagabo itangira, amakipe akomeje kwiyubaka mu buryo butandukanye. Ikipe zishamikiye ku bashinzwe Umutekano, ziri mu zifite inyota yo kuzaba zihanganiye ibikombe byose bizakinwa muri uyu mwaka w’imikino 2024-25. Ni yo mpamvu mu bakinnyi berekanywe muri iyi kipe, harimo abashya bazanye amaraso mashya.
Umuhango wo kwerekana abakinnyi bazifashishwa muri izi kipe za Police VC na Police WVC, wabaye ku wa Gatatu tariki ya 16 Ukwakira 2024, ubera ku Cyicaro Gikuru cya Polisi y’u Rwanda giherereye Kacyiru.
Mu bitabiriye uyu muhango, harimo DCG JC Ujeneza (Deputy Inspector General of Police in charge of Administration & Personnel) na CSP Jackline Urujeni, umuyobozi w’amakipe ya Volleyball. Hari kandi abatoza, abakinnyi b’amakipe yombi azitabira shampiyona y’u Rwanda izatangira kuri uyu wa Gatanu tariki ya 18 Ukwakira 2024.
Mu kwitegura uyu mwaka, ikipe ya Police Volleyball VC yongeyemo abakinnyi batatu. Aba barimo na Manzi Saduru wavuye muri APR VC, Jahara Koita (Outside Hitter) wakinaga mu ikipe ya OMK VC yo muri Algérie na Ishimwe Patrick (Receiver attacker) wasoje amashuri yisumbuye ari mu beza mu ikipe ya GS Officiel de Butare.
Mu ikipe y’Abagore hongewemo Ayepoe Sandra Azuremah ukomoka muri Ghana (Middle Blocker) wakiniraga El Walk Wings y’iwabo.
Herekanywe kandi umutoza ushinzwe kongerera abakinnyi imbaraga mu ikipe y’Abagore ari we Murangwa Usenga Sandrine n’ushinzwe itangazamakuru mu makipe yombi, Imani Isaac Rabbin.
Izi kipe zombi, zageze mu mikino ya kamarampaka z’abari bahanganiye igikombe cya shampiyona mu mwaka ushize. Zombi zatsindiwe ku mikino ya nyuma na APR WVC ndetse na APR VC.
Biteganyijwe ko shampiyona y’icyiciro cya mbere mu bagabo n’abagore, izatangira ejo tariki ya 18 Ukwakira 2024. Police VC izatangira ikina na REVC Saa Moya z’ijoro. Mu bagore, RRA WVC izaba ikina na Kepler WVC Saa Kumi n’imwe z’amanywa. Imikino yose izabera muri Petit Stade. Police WVC itozwa na Hatumimana Christian izatangira ikina n’ikipe ya East Africa University Rwanda WVC, ni umukino uzakinwa ku wa Gatandatu tariki ya 19 Ukwakira guhera saa saba z’amanywa.
- Advertisement -
UMUSEKE.RW
