APR yasezereye AS Kigali mu Gikombe cy’Intwari

Ibitego 2-0 yatsinze AS Kigali, byatumye ikipe y’Ingabo iyisezerera muri 1/2 cy’irushanwa ry’Igikombe cy’Intwari 2025.

Kuri uyu wa Kabiri, ni bwo hatangiye Irushanwa ry’Igikombe cy’Intwari cy’uyu mwaka. Amakipe ane ya mbere ku rutonde rwa shampiyona, ni yo yafashwe ngo arikine.

Iyi mikino ya 1/2, yabereye kuri Kigali Pelé Stadium, wabimburiwe n’uwa APR FC yari yakiriye AS Kigali guhera Saa Cyenda z’amanywa.

Ikipe y’Ingabo, yari ifite abakinnyi babiri bashya bakomoka muri Uganda, iheruka gusinyisha. Ni Denis Omedi na Hakim Kiwanuka, mu gihe ikipe iterwa inkunga n’Umujyi wa Kigali, na yo yari ifite Haruna Niyonzima uheruka kuyisinyira.

Mu kavura karinganiye, umukino watangiye utihuta ariko uko iminota yicuma, amakipe agenda yihutisha umupira.

Iminota 20 ya mbere, amakipe yasaga n’agicungana ariko buri kimwe ikiba indi umugono ikihutisha imipira yahitaga igera mu busatirizi.

Ku munota wa 37, AS Kigali yashoboraga kubona igitego ku buryo Emmanuel Okwi yari abonye nyuma y’umupira wari uzamukanywe na Haruna Niyonzima, ariko Niyigena Clèment na Aliou Souané, bari beza mu bwugarizi.

Ku munota wa 39, ikipe y’Ingabo na yo yari ibonye igitego cya Hakim Kiwanuka, ariko umupira ukomeye yari ateye mu izamu, Cuzuzo Gaël awushyira hanze.

Iminota 45 y’igice cya Mbere, yarangiye nta kupe ibashije kubona izamu ry’indi. Amakipe yombi akigaruka mu gice cya Kabiri, ikipe y’Ingabo yagarukanye imbaraga nyinshi ukurije uko yakinnnye iminota y’igice cya Mbere.

Izi mbaraga za APR FC z’igice cya Kabiri, zatumye ku munota wa 57 ibona penaliti ku mupira wakozwe na Akayezu Jean Bosco nyuma y’ishoti ryari ritewe na Mamadou Lamine Bah.

N’ubwo nta mukinnyi n’umwe ndetse n’abatoza bose, wigeze yemera iyi penaliti, ariko umusifuzi, Ngabonziza Jean yahise yemeza ko ari penaliti.

Denis Omedi yahise ayitsinda neza, maze abakunzi b’iyi kipe, binaga ibicu bishimira igitego cya Mbere cy’uyu munya-Uganda muri kipe ye nshya.

AS Kigali yahise imera nk’ikangutse, ikuramo Hussein Shaban Tchabalala na Nkubana Marc, basimburwa na Dushimimana Gilbert na Ndayishimiye Didier. Ni abasore abasabwaga gufasha cyane ikipe ya bo yari yamaze gutsindwa igitego.

Ikipe y’Ingabo nta bwo yigeze yorohera Abanya-Mujyi, ndetse ikomeza gukina ishaka igitego cya kabiri.

Ku munota wa 80, ni bwo ibintu byongeye kuba bibi kuri AS Kigali, ku gitego cyatsinzwe na Niyibizi Ramadhan nyuma y’umupira uteretse yatereye ku ruhande rw’ibumoso ku ikosa ryari rikozwe na Gilbert.

Gutsindwa igitego cya kabiri, byahise bica umugongo AS Kigali ndetse icyizere cyo kubyishyura gihita kigabanuka cyane.

Icyakurikiyeho ku kipe y’Ingabo, kwari ugucunga ibitego bya yo ndetse iminota 90 irangira yegukanye intsinzi y’ibitego 2-0, ihita igera ku mukino wa nyuma w’irushanwa ry’Intwari ry’uyu mwaka.

Insanganyamatsiko y’uyu mwaka mu kwizihiza umunsi w’Intwari, yari “Ubutwari n’Ubumwe bw’Abanyarwanda, inkingi z’iterambere.”

APR FC igomba gucakirana na Police FC yasezereye Rayon Sports kuri penaliti 3-1 nyuma yo kunganya igitego 1-1. Umukino wa nyuma, uteganyijwe ku wa Gatandatu tariki ya 1 Gashyantare 2025 kuri Stade Amahoro.

UMUSEKE.RW