Umugabo usanzwe wishyuza amafaranga y’abakora irondo ry’umwuga basanzwe banacunga umutekano, yatewe n’abagizi ba nabi, imbwa ye iricwa.
Mu gicuku cyo kuri uyu wa 28 Mutarama 2025 nibwo umugabo witwa Mugabo Justin usanzwe wishyuza amafaranga ahembwa abakora irondo ry’umwuga mu Mudugudu wa Rugarama mu kagari ka Rwesero mu Murenge wa Busasamana mu karere ka Nyanza yatewe n’abagizi ba nabi akeka ko ari abaturanyi be, bamumenera ibirahure, banamusaba gusohoka “ngo kuko yigize umunyabwange.”
Mu kiganiro uriya mugabo yagiranye na UMUSEKE yavuze ko muri kiriya gicuku iwe haje igitero avuga ko ari abaturanyi be.
Uyu avuga ko bamuteye bakomanga iwe, arabyuka, arebye abona umwe muri bo afite ikibando, afite isuka, na nta joro(isanzwe yahira ubwatsi bw’inka).
Mugabo Justin yakomeje avuga ko bariya bari bamuteye bamusabye gusohoka, bavuga ngo “ bakamwereka dore ko yigize umunyabwange.”
Mugabo yemeje ko yanze gusohoka ahubwo avuza indura niko gufata biriya bikoresho bari bitwaje bamena ibirahure bagira ngo bamusange mu nzu imbere.
Mugabo kandi yongeyeho ko mu gihe bariho bamena ibirahure nawe avuza induru, imbwa ye iri mu gipangu yamwumvise iramoka maze bahita biruka, abo bakekwaho ubugizi bwa nabi nabo bahita bayica.
Mugabo Justin ati”Ntacyo twapfaga uretse ko najyaga njya kubishyuza umutekano mu bisanzwe.”
Mugabo Justin muri uko kuvuza induru kwe, yatabaje abaturanyi, baraza ,bagiye kureba umuturanyi ukekwa na bagenzi be aho baba basanga ntabahari cyakora hari imbwa iharambaraye yapfuye.
- Advertisement -
Umunyamabanga Nshingwabikorwa w’Umurenge wa Busasamana Bizimana Egide yabwiye UMUSEKE ko icyo kibazo cyabaye kandi byamenyekanye bityo inzego zibishinzwe zatangiye iperereza.
Ubwo twateguraga iyi nkuru abakekwa bari batarafatwa bagishakishwa.
Théogène NSHIMIYIMANA
UMUSEKE.RW i Nyanza
