Ishuri ry’imyitozo ya Gisirikare rya Gabiro, ryegukanye igikombe cy’Irushanwa ry’Intwari ryahuzaga ibigo bya Gisirikare nyuma yo gutsinda Special Operations Force penaliti 4-2 nyuma y’uko amakipe yombi yari yanganyije 0-0 mu minota 90.
Kuri uyu wa Gatanu, ni bwo hasojwe irushanwa ry’Intwari ryahuzaga ibigo bya Gisirikare. Uwari uhanzwe amaso na benshi, ni uw’umupira w’amaguru wahuje Ishuri ry’imyitozo ya Gisirikare rya Gabiro na Special Operations Force (SOF). Uyu mukino wabereye kuri Kigali Pele Stadium, wari wahuruje abatari bake biganjemo Ingabo z’u Rwanda.
Aya makipe yombi, yageze ku mukino aciye mu nzira zikomeye kuko SOF yasezereye Diviziyo ya Gatanu muri ½ mu gihe Gabiro yasezereye ikipe y’Abasirikare barinda Abayobozi Bakuru b’Igihugu (Republican Guard) isanzwe ibitse ibi bikombe byinshi.
Ni umukino watangiye Saa munani n’igice z’amanywa, urimo guhangana ku mpande zombi, cyane ko abakinnyi b’amakipe yombi batigeze kurekura mu minota 90 yose y’umukino.
Bamwe mu bayobozi bakurikiye uyu mukino, barimo Umunyamabanga wa Leta muri Minisiteri ya Siporo, Rwego Ngarambe,Minisitiri w’Ingabo, Juvénal Marizamunda, Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe ubufatanye n’akarere, Gen (Rtd) James Kabarebe, Umugaba Mukuru w’Ingabo, Gen. Mubarakh Muganga, Umugaba Mukuru w’Inkeragutabara, Maj. Gen, Alex K, agame, Umugaba wungirije w’Ingabo zirwanira mu Kirere, Brig Gen Godfrey Gasana n’Umunyamabanga Nshingwabikorwa w’Urwego rushinzwe Intwari z’Igihugu, Imidali n’Impeta by’Ishimwe (CHENO), Nkusi Déo.
Iminota 90 y’umukino, yarangiye amakipe yombi nta n’imwe ibashije kubona izamu ry’indi bisaba ko hitabazwa za penaliti. Ishuri ry’imyitozo ya Gisirikare rya Gabiro, ryinjije penaliti enye mu gihe SOF yinjije ebyiri, birangira Gabiro yegukanye igikombe cy’Intwari cya 2025.
Uretse kwegukana igikombe cy’umupira w’amaguru, SOF yanegukanye icya Basketball, RG na yo nta bwo yaviriyemo aho kuko yegukanye icya Volleyball, icya Handball cyegukanywe n’Ishuri rya Gisirikare rya Gako (RMA Gako), icya Netball cyo cyegukanywe n’ikipe y’Ingabo zirwanira mu Kirere, SOF iragaruka yegukana icyo Kurasa. Umurashi mwiza w’imbunda ya 81-1, yabaye Cpt, Mulisa Anastase wo muri Military Police, Umurashi mwiza w’imbunda ya Pistol, yabaye Staff Sergent, Mutangana Victor wa Republican Guard mu gihe Sgt Mukasakindi Claudette ari we wahize bagenzi be mu kwiruka muri metero 5000 n’amaguru.
Iri rushanwa rihuza ibigo bya Gisirikare, risanzwe ari ngarukamwaka, ibikombe byinshi bibitswe na RG ifatwa nka Real Madrid muri iri rushanwa.
UMUSEKE.RW
