Ukeneye kwamamaza! Gusobanuza! Gutanga amakuru? Hamagara 0788772818
Minisiteri y’ubuzima mu Burundi n’ishami ry’umuryango w’abibumbye ryita ku buzima ku isi OMS batangaje ko mu gihe kingana n’icyumweru kimwe, muri iki gihugu habonetse abantu 127 barwaye Covid-19.
Raporo ya OMS mu Burundi yerekana ko muri abo 127, 112 ari abo hagati mu gihugu cyane mu Ntara za Kirundo na Ngozi, abandi bantu 15 basanzwemo Coronavirus ni abaje bavuye hanze y’igihugu nko muri Repubulika ya Demokarasi ya Kongo, muri Tanzania, mu Rwanda, muri Kenya no mu Bubiligi.
Iyi raporo yakozwe na OMS harimo n’impuguke muri Minisiteri y’ubuzima mu Burundi, isobanura ko Covid-19 yiganje muri rusange mu Turere 8 tw’ubuvuzi tugizwe n’Intara 8 kuri 18 zigize kiriya gihugu.
Minisitiri w’ubuzima mu Burundi, Thadée Ndikumana yavuze ko ibi biteye amakenga ku buryo abantu bakwiriye kwikubita agashyi bagakurikiza amabwiriza yo kwirinda icyorezo cya Covid-19.
Minisitiri Ndikumana avuga ko iyo mibare iteye ubwoba, ni mu gihe Uburundi butaremera gukoresha inkingo za Covid-19.
Kuva Uburundi bwemera ko Covid-19 yinjiye muri iki gihugu, butangaza ko abamaze kwandura Covid-19 barenga ibihumbi 6, 8 bamaze gupfa, 5300 baracyarwaye mu gihe 770 bamaze gukiraiki cyorezo.
Abo mu mashyirahamwe yigenga bavuga ko imibare itangwa na Leta itariyo kuko hamaze gupfa abarenga abatangajwe na Leta bazize Covid-19.
Uburundi na Eritrea ni byo bihugu byonyine ku mugabane wa Afurika bitarasaba inkingo za Covid-19 mu mugambi wa Covax cyangwa mu mugambi w’ishyirahamwe ry’Ubumwe bwa Afurika uzwi nka Vaccine Acquisition Trust.
- Advertisement -
NDEKEZI JOHNSON /UMUSEKE.RW