Abantu 5 bahitanywe na Covid-19 handura abarwayi bashya 470

Ukeneye kwamamaza! Gusobanuza! Gutanga amakuru? Hamagara 0788772818

Minisiteri y’ubuzima yatangaje ko kuri uyu wa Gatanu taliki ya 10 Nzeri 2021, abarwayi bashya 470 b’icyorezo cya COVID-19 batumye umubare w’abamaze gutahurwaho icyo cyorezo kuva cyagera mu Rwanda ugera ku 92,025 barimo abakabakaba 82,000 bamaze gukira n’abandi 8,700 bakirimo kwitabwaho n’abaganga.

Aba barwayi bashya babonetse mu bipimo 11,378 bakaba bari ku gipimo cy’ubwandu kiri ku kigero cya 4.1%, mu gihe n’abapfuye uyu munsi ari 5 barimo umugore 1 n’abagabo 4 bagejeje umubare w’abamaze gupfa ku 1,158.

Umugore wapfuye ni uw’imyaka 78 wo muri Nyamagabe, mu gihe abagabo bapfuye barimo uw’imyaka 97 w’i Nyagatare, uwa 85 w’i Burera, uwa 81 w’i nyamasheke n’uwa 76 w’i Karongi.

Abarwayi bashya batangajwe barimo abo muri Nyagatare 128, Nyamasheke 63, Kigali 35, Gicumbi 30, Nyaruguru 27, Rusizi 26, Rwamagana 26, Bugesera 25, Musanze 18, Huye 15, Muhanga 13, Ngororero 13, Nyanza 12,Rulindo 9, Gakenke 8, Gatsibo 6, Karongi 6, Kayonza 4, Gisagara 3, Rutsiro 1, Nyamagabe 1 na Burera 1.

Uyu munsi abarwayi 6 ni bo basezerewe mu bitaro, mu gihe abashya bahawe ibitaro ari 9 na ho mu bantu bakirwaye hakaba harimo 18 barembye.

Abamaze gukingirwa icyorezo cya COVID-19 bageze kuri 1,711,757 barimo abantu 43,432 bakingiwe uyu munsi. Ni mu gihe abamaze guhabwa doze zombi z’urukingo ari 932,692 barimo 8,459 bakingiwe kuri uyu wa Kane.

Uyu munsi doze zirenga 137,000 z’urukingo rwa AstraZeneca n’izindi 97,000 zo mu bwoko bwa Sinopharm ni bwo zatangiye mu Turere 21 mu Ntara zose z’Igihugu mu cyiciro gishya cyatangijwe cyo gukingira. Zirahabwa abafite kuva ku myaka 50 kuzamura n’abafite indwara zidakira.

- Advertisement -

Guverinoma y’u Rwanda irashimira abaturarwanda uruhare rwabo muri uru rugamba rwo kurwanya iki cyorezo, ikaba ibasaba kwitabira kwikingiza kuko inkingo zigenda zirushaho kuboneka, ndetse no kwisuzumisha kenshi kugira ngo bagabanye ikwirakwira rya COVID-19.

Inzego z’ubuzima ziraburira buri wese kwitwararika kuko mu Gihugu hari ubwoko bwa COVID-19 yihinduranyije bwitwa Delta bugize hafi 60% y’ubwandu bushya, bukaba bwandura vuba kandi bugatuma abantu banaremba vuba ndetse bamwe bakagira n’ibyago byinshi byo kubura ubuzima.