Ukeneye kwamamaza! Gusobanuza! Gutanga amakuru? Hamagara 0788772818
Kuri iki Cyumweru taliki 05 Nzeri 2021 ni bwo hasoje imikino y’Afurika mu bagabo “FIBA AfroBasket Rwanda 2021” yaberaga mu Rwanda kuva taliki 24 Kanama 2021, Tunisia yegukanye igikombe ku manota 78- 75 itsinze Cote d’Ivoire.
Tunisia yisubije igikombe kuko ari yo yari yagitwaye ubushize muri 2017, ndetse nk’uko byagenze Senegal yongera kwegukana umwanya wa 3.
Tunisia yegukanye igikombe itsinze ku mukino wa nyuma Cote d’Ivoire amanota 78 kuri 75. Tunizia yatsinze uduce 2 tubanza ku manota 25 kuri 18 na 22 kuri 16 mu gihe Cote d’Ivoire na yo yatsinze uduce tubiri twa nyuma ku manota 25 kuri 18 na 16 kuri 13.
Muri uyu mukino, Salah Mejri ukinira ikipe ya Tunizia ni we witwaye neza aho yatsinze amanota menshi 22 naho Souleyman Diabate ukinira Cote d’Ivoire atsinda 20.
Mu mukino wo guhatanira umwanya wa 3, ikipe ya Senegal yitwaye neza itsinda Cap Vert amanota 86 kuri 73.
Iyi kipe ya Senegal yongeye kwegukana umwanya wa 3 kuko no mu irushanwa riheruka muri 2017 yari yagukanye umwanya wa 3 itsinze Maroc amanota 73 kuri 62.
Makram Ben Romdhane ukinira ikipe y’igihugu ya Tunisia yahawe igihembo cy’umukinnyi witwaye neza mu irushanwa ryose (MVP).
Gorgui Dieng (Senegal) yahawe igihembo cy’uwatsinze amanota menshi (120) mu mikino yose.
- Advertisement -
Umukinnyi wa Cap Vert, Walter Tavares yahawe igihembo cy’uwarushije abandi gufata imipira itageze mu nkangara (Best Rebounder) aho yafashe imipira 80. Carlos Morais wa Angola yahawe igihembo cy’uwarushije abandi gutsinda amanota 3 aho yayatsinze inshuro 19.
Nyuma y’ibi bihembo by’abakinnyi ku giti cyabo hanatowe ikipe y’irushanwa igizwe na Makram Ben Romdhane (Tunisia), Omar Abada (Tunisia), Matt Costello (Cote d’Ivoire), Gorgui Dieng (Senegal) na Walter Tavares (Cap Vert).
Uko amakipe yakurikiranye
Tunisia yegukanye umwanya wa mbere, Cote d’Ivoire (2), Senegal (3), Cap Vert (4), South Sudan (5), Angola (6), Uganda (7), Guinea (8), Nigeria (9), Rwanda (10), Misiri (11), Kenya (12), RDC (13), Centrafrique (14), Mali (15) na Cameroun (16).
Imikino y’Afurika “FIBA AfroBasket” kuva 2017 hemejwe ko izajya iba nyuma y’imyaka 4 ari yo mpumvu imikino itaha izaba muri 2025.
UMUSEKE.RW
