AS Kigali Women yaguze abakinnyi babiri muri Scandinavia Women

Ukeneye kwamamaza! Gusobanuza! Gutanga amakuru? Hamagara 0788772818

Ubuyobozi bw’Ikipe ya AS Kigali Women FC, bwakuye Mukandayisenga Nadine na Ukwinkunda Jannette uzwi nka Jiji, muri Scandinavia Women FC yo mu Karere ka Rubavu.

Uko iminsi yo gutangira imyitozo ku makipe y’abagore yicuma, ni na ko amwe mu makipe akina shampiyona y’Icyiciro cya Mbere akomeza kwiyubaka bucece.

Muri uko gukomeza kwiyubaka, Ikipe ya AS Kigali Women FC isanzwe ikina mu Cyiciro cya Mbere, yaguze abakinnyi babiri, Mukandayisenga Nadine ukina hagati afasha ba myugariro na Ukwinkunda Jannette uzwi nka Jiji ukina mu busatiri ku ruhande rw’ibumoso, bakiniraga mukeba wa yo, Scandinavia Women FC ibitse igikombe cya Shampiyona giheruka.

Uretse aba bakinnyi kandi, iyi kipe yagaruye umunyezamu, Nyirabashyitsi Judith ndetse  yongerera amasezerano Nibagwire Sifa Gloria izana na Mutuyemariya Valentine ukina hagati afasha ba rutahizamu (8) yakuye muri Fatima Women FC y’i Musanze, na myugariro w’ibumoso, Nyiransabera Milliam wavuye muri Rambura na myugariro w’iburyo, Ingabire Aline wavuye muri Rukoma Women FC.

Biteganyijwe ko ku wa Mbere tariki ya 6 Nzeri, ari bwo iyi kipe izapima COVID-19 abakinnyi bayo hanyuma igahita itangira imyitozo itegura umwaka mushya w’imikino 2021-2022.

AS Kigali Women FC ni yo kipe ibitse ibikombe byinshi bya shampiyona, kuko kuva mu 2008 ishingwa imaze kwegukana 10, mu gihe Scandinavia Women FC ibitse kimwe cya shampiyona mu myaka itanu imaze ishinzwe.

Biteganyijwe ko shampiyona y’abagore mu byiciro byombi izatangira tariki ya Mbere Ugushyingo 2021, ikarangira tariki ya 02 Mata 2022.

REBA YouTube Channel UMUSEKE TV video nziza nk’iyi. UKORA LIKE SHARE na COMMENT

UMUSEKE.RW