U Bwongereza bwakuye u Rwanda ku ruparuro rutukura ruriho ibihugu abaturage babyo bafatwa nk’abatarakingiwe Covid-19 iyo bageze muri iki gihugu.
Abantu baherewe mu Rwanda inkingo za Covid-19 uko ziteganyijwe, guhera ku wa 1 Ugushyingo, 2021 ntabwo bazongera gufatwa nk’abatarakingiwe icyorezo cya Covid-19 bageze mu Bwongereza. Ni icyemezo cyafashwe kuri uyu wa Kane, tariki 28 Ukwakira 2021.
Aya makuru yanashimangiwe na Ambasaderi w’u Bwongereza mu Rwanda, Omar Daair wavuze ko icyemezo cy’uwakingiwe Covid-19 gitangwa n’Ikigo cy’Igihugu cy’Ubuzima mu Rwanda cyahawe agaciro n’u Bwongereza.
Ati “Ni amakuru meza, u Rwanda rwongewe ku rutonde rw’ibihugu icyemezo cy’uwakingiwe gihabwa agaciro bagiye mu Bwongereza. Niba warahawe inkingo zose ufite icyemezo cya RBC wajya mu Bwongereza nta kibazo.”
Nk’uko amabwiriza yo kwirinda Covid-19 y’u Bwongereza abigaragaza ku bagenzi bava mu bihugu bitandukanye bajya muri iki gihugu, avuga ko ukorerayo ingendo udafatwa nk’utarakingiwe agomba kuba yarahawe inkingo zose za Covid-19 mbere y’iminsi 14 uwo yaruhereweho utarimo.
Ubwoko bw’inkingo zemewe ni AstraZeneca, Pfizer rukorwa na BioNTech, Moderna na Janssen.
Gusa umugenzi wahawe doze imwe y’urukingo rwa Janssen afatwa nk’uwahawe inkingo zuzuye. Abagenzi bazajya bava mu Rwanda bagiye mu Bwongereza bazajya babanza kwipimisha Covid-19 mu minsi ibiri mbere yo gufata indege.
Umuntu uzajya ajya muri iki gihugu agomba kumarayo iminsi irenze ibiri agomba no kujya asaba mbere akanishyura ikiguzi cyo kwisuzumisha Covid-19 mu minsi ibiri ukuyemo uwo yagereyeyo.
Abipimisha uburyo bwihuse bwa (Rapid test) bagasanga bafite ubwandu bwa Covid-19 basabwe kujya bahita bakoresha n’uburyo bwa PCR. Usanze afite iki cyorezo akazirikana ko agomba kwishyira mu kato k’iminsi 10.
- Advertisement -
Ibindi bihugu bya Afurika abaturage babyo batazongera gufatwa nk’abatarakingiwe kandi barahawe inkingo zombi za Covid-19, birimo Tanzania, Tunisia, Uganda, Sierra Leone, Seychelles, Madagascar, Eswatini, n’ibindi.
Ku wa 18 Nzeri 2021, nibwo u Bwongereza bwatangaje ko abantu bakingiriwe muri bimwe mu bihugu by’Afurika harimo n’u Rwanda, Amerika y’Amajyepfo, Ubuhinde, Thailand, Leta Zunze Ubumwe z’Abarabu, Turikiya, Jordan n’u Burusiya bazajya bafatwa nk’abatarakingiwe bageze muri iki gihugu.
Aho abagenzi bose baturuka muri ibi bihugu basabwaga kujya mu kato k’iminsi 10 kandi bakanipimisha Covid-19. Ni umwanzuro utari waravuzweho rumwe nubwo ibihugu byose bitarakurwa kuri uru rutonde.
Impamvu zatangagwa n’u Bwongereza nuko ngo batizeye neza imitangire y’inkingo za Covid-19 muri ibi bihugu, ku buryo ngo bangaga ko hari abahimba ibyangombwa ko bakingiwe.
Ukeneye kwamamaza! Gusobanuza! Gutanga amakuru? Hamagara 0788772818
NKURUNZIZA Jean Baptiste / UMUSEKE.RW