Ishyirahamwe ry’umupira w’amaguru mu Rwanda FERWAFA ryashyize amakipe 25 mu matsinda abiri azakinirwamo shampiyona y’umupira w’amagaru mu bagabo icyiciro cya kabiri cy’umwaka w’imikino wa 2021-2022.
Inama ya Komite Nyobozi ya FERWAFA yateranye kuri uyu wa Gatanu, tariki 22 Ukwakira 2021, yanzuye ko shampiyona y’icyiciro cya kabiri iazkinwa mu matsinda abiri nk’uko byari bisanzwe.
Iyi shampiyona ikazakinwa n’amakipe 25 agabanyije mu matsinda abiri, itsinda A rikaba rigizwe n’amakipe 13 naho itsinda B ririmo amakipe 12.
Amakipe azakinira mu itsinda A ni Sunrise FC yamanutse ivuye mu cyiciro cya mbere, Rwamagana City FC, Esperance Sportive de Kigali, Nyagatare FC, Kirehe FC, Vision FC,Alpha FC, Miroplast FC, Impesa FC, Akagera FC, Amagaju FC, Rugende FC na Nyanza FC.
Naho itsinda rya B, rirangajwe imbere na AS Muhanga yamanutse nayo muri iki cyiciro ivuye mu cya mbere, hakabamo La Jeunesse FC, Intare FC, Gasabo United, Unity SC, The Winners FC, Heroes FC, United Stars, Giticyinyoni FC, Interforce FC, Kaminuza y’u Rwanda ndetse na Aspor FC.
Aya matsinda y’icyiciro cya kabiri ashyizwe ahagaragara mu gihe, shampiyona y’icyiciro cya kabiri mu bagabo umwaka wa 2020-2021 yegukanywe n’ikipe ya Gicumbi FC, umwanya wa kabiri ukegukanwa na Etoile de L’est, ari nazo kipe ebyiri zazamutse gukina shampiyona y’icyiciro cya mbere mu abagabo.
Aya makipe abiri yazamutse mu cyiciro cya mbere akaba yaragiye gusimbura Sunrise FC na AS Muhanga zamanutse gukina icyiciro cya kabiri.
Aya matsinda y’icyiciro cya kabiri ashyizwe hanze nyuma y’iminsi mike hashyizwe hanze ingengabihe ya shampiyona y’icyiciro cya mbere igomba gutangira kuri 30 Ukwakira 2021.
Inama ya Komite Nyobozi ya FERWAFA yateranye tariki ya 22 Nzeri 2021, mu myanzuro yayo yemeje ko shammpiyona y’icyiciro cya Mbere n’icya Kabiri mu mupira w’amaguru mu bagabo igomba gutangira tariki ya 30 Ukwakira yigijwe inyuma ho gato kuko yagombaga gutangira ku wa 16 Ukwakira 2021.
- Advertisement -
Ukeneye kwamamaza! Gusobanuza! Gutanga amakuru? Hamagara 0788772818
NKURUNZIZA Jean Baptiste / UMUSEKE.RW
