Mu rwego rwo gukomeza gukangurira inzego zinyuranye gukomeza kwirinda no kurinda abandi Covid-19, Akarere ka Kicukiro gakomeje gukora ibikorwa bitandukanye bihamagarira abahatuye kutadohoka.
Ba mutimawurugo bafatanyije n’Ubuyobozi bw’Akarere, Police ishyirahamwe ry’abatwara abantu kuri moto, n’urubyiruko bateguye ibikorwa bitandukanye byo kwibutsa gukomeza kwirinda no kurwanya covid-19.
Umuhoza Clarisse umwe mu bagore bitabiriye iki gikorwa, yavuze ko icyorezo cya Covid-19 cyagiye kibicira akazi ku buryo bagifatiye ingamba mu kazi kabo ka buri munsi, birinda bakanarinda n’abakiliya.
Ati “Twebwe nk’abagore ntabwo tugomba kwirara, kumva ko bafunguye ntabwo bivuze ko Corona yarangiye, ahubwo tugomba gukaza ingamba tukambara neza agapfukamunwa.”
Umuhoza Clarisse yakomeje avuga ko ba mutimawurugo bagomba kurinda abo mu miryango yabo, bababwira gukurikiza ingamba mu kurwanya Covid-19.
Kantengwa Diane na we witabiriye iki gikorwa yavuze ko batazacika intege kubera Covid -19, ahubwo ko bakomeza kwirinda, nta kujenjeka, bakurikiza neza amabwiriza.
Umuhire Christiane umuhuzabikorwa w’inama y’abagore mu Karere ka Kicukiro yavuze ko iki gikorwa cyateguwe na ba mutimawurugo cyane cyane bagaragaza ko umugore nagira uruhare mu kukirinda azarinda n’abantu benshi mu muryango.
Ati ”Iyo uteje imbere umugore uba uteje imbere umuryango munini, uba uteje imbere umuryango wose ndetse uba uteje imbere n’abantu bose bagendana na we ababwiriza, abaha ubutumwa bwo kwirinda Covid-19 kugira ngo bugere no kuri benshi.”
Ubu bukangurambaga bwabereye ahantu hahurira abantu benshi, ku isoko rya Gahoromani, no mu isoko rya Biryogo mu Murenge wa Masaka.
- Advertisement -
Kuri buri site, hagiye habaho gutanga ubutumwa, kubaza ibibazo bijyanye no kwirinda Covid-19 no gutanga ibihembo bigizwe na sanitiser n’agafukamunwa ku basubije neza, kwambika za moto n’imodoka stickers ziriho ubutumwa bwo kurwanya Covid-19, guha abamotari udupfukamunwa, no gukora urugendo rukangurira abantu bose gukomeza kurwanya Covid-19.
Insanganyatsiko y’iki gikorwa cyagiraga giti “Mutimawurugo ni inkomezamihigo guma ku ruhembe rwo kwirinda no gukangurira abandi kwirinda icyorezo cya Covid -19”.
Ukeneye kwamamaza! Gusobanuza! Gutanga amakuru? Hamagara 0788772818
Daddy SADIKI RUBANGURA
UMUSEKE.RW