Kuri uyu wa Mbere i Khartoum haramukiye imyigaragambyo ikomeye nyuma y’uko Abasirikare bafunze Minisitiri w’Intebe w’umusivile, Abdallah Hamdok n’abandi basivile bose bari bagize Guverinoma bahuriyemo n’abasirikare.
Mu masaha y’igicamunsi Gen Abdel Fattah Abdelrahman Burhan Umuyobozi w’Akanama Mpinduramatwara (Sudan’s Sovereign Council) kahiritse ku butegetsi Omar al-Bashir yatangaje ko igihugu kigiye mu bihe bidasanzwe.
Mu itangazo ryanyuze kuri televiziyo y’igihugu yigaruriwe n’abasirikare kuri uyu wa Mbere, yavuze ko asheshe Guverinoma ndetse igihugu kinjiye mu bihe bidasanzwe.
Yavuze ko abantu bose bari mu Kanama kayoboye igihugu mbere y’uko hashyirwaho ubuyobozi binyuze muri Demokarasi, bahagaritswe mu mirimo yabo.
Uretse gusesa Guverinoma, yavuze ko na ba Guverineri b’Intara bose bakuwe mu myanya yabo.
Gen Abdel Fattah Abdelrahman Burhan yavuze ko Guverinoma izasimbura iyavuzeyo izatangazwa mu mpera z’ukwezi k’Ugushyingo, 2021 naho amatora akazaba muri Nyakanga, 2023 hajyaho Guverinoma y’abasivile.
Minisitiri w’Intebe wari uriho afungiye ahantu hatazwi
Abdallah Hamdok wari uyoboye Guverinoma we n’umugore we bakuwe mu nzu yabo i Khartoum bajyanwa ahantu hatazwi mu masaha ya kare kuri uyu wa Mbere, nk’uko byatangajwe na Minisiteri y’Umuco n’Itunamanaho kuri Facebook page.
- Advertisement -
Minisiteri ivuga ko ibyabaye ari uwkica Itegeko Nshinga ndetse bikaba ari Coup d’Etat.
Itangazo rihamagarira abatuye Sudan kujya mu mihanda bakigaragambya mu mahoro kugira ngo barinde “impinduramatwara”.
Muri Mata 2019 nibwo itsinda ry’Abasirikare ryafashe ubutegetsi rikuraho, Omar al-Bashir nyuma y’igitutu cyatangiye ari abagore bigaragambiriza guhenda k’umugati. Abasivile bakomeje gusaba ko ubutegetsi bujya mu maboko y’abasivile, habasha kujyaho Guverinoma Abasivile bahuriyeho n’abasirikare.
Gusa, mu minsi ya vuba aha hatangiye ubwumvikane buke hagati y’abasivile n’abasirikare bari muri Guverinoma. Urwikekwe rwiyongereye ubwo havugwaga gushaka guhirika ubutegetsi ariko umugambi ukaburizwamo.
BBC dukesha iyi nkuru ivuga ko abantu 12 bamaze gukomerekera mu myigaragambyo.
Ukeneye kwamamaza! Gusobanuza! Gutanga amakuru? Hamagara 0788772818
UMUSEKE.RW
