APR FC ifashe umwanya wa 2 by’agateganyo nyuma yo gutsinda Gasogi United

Kuri iki Cyumweru nibwo habaga umukino w’ikirarane aho ikipe y’Ingabo z’Igihu “APR FC” yatsinze Gasogi United 2-0, ihita ifata umwanya wa kabiri by’agateganyo muri Shampiyona.

Umukino watangiye APR FC ishaka kubona igitego bubi na bwiza ndetse biza no kuyihira nubwo byasabye gutegereza iminota 46 kugira ngo igitego kiboneke gitsinzwe na Mugunga Yves.

Nyuma yo kumva inama z’abatoza ku mpande zombi APR FC yagombaga kubona igitego cya kabiri hakiri kare ariko umupira Mugunga Yves yahaye Mugisha Gilbert awutera hejuru y’izamu.

Gasogi United yakomeje kugerageza uburyo ngo irebe ko yakwishyura igitego yatsinzwe ariko abakinnyi ba APR FC bayibera ibamba.

Ku munota wa 77 APR FC yabonye penaliti yinjijjwe neza na Byiringiro Lague wari umaze gukorerwaho ikosa na Kaneza Augustin mu rubuga rw’amahina.

Amahirwe Gasogi United yabonye mu mukino ntabwo yabashije kuyabyaza umusaruro harimo n’umupira w’umuterekano Bugingo Hakimu yateye hanze y’izamu.

Kugeza ubu APR FC iri ku mwanya wa kabiri n’amanota 20, irushwa atatu na Kiyovu Sports ya mbere n’ubwo APR FC ifite imikino ibiri y’ibirarane irimo uzayihuza na Mukura Victory Sports n’uwa Rustiro FC.

APR FC izasubira mu kibuga ku wa Gatatu yakira Espoir FC yo mu Karere ka Rusizi mu mukino w’umunsi wa 11 wa Shampiyona, uzabera kuri Stade ya Kigali i Nyamirambo saa cyenda.

UMUSEKE.RW