Rusizi: P Fla, Fireman na Mc Tino bagiye guhurira mu gitaramo cyo kumurika album ya Javanix

Umuhanzi Javanix ukorera ukomoka mu Karere ka Rusizi agiye kumurika umuzingo(Album) we wa mbere azashyira hanze ku itariki 11 Ukuboza 2021 muri Motel Rubavu i Kamembe.

Javanix ni umuhanzi utaratinze kuzamuka, kuva akimara gusohora indirimbo ye ya mbere muri 2018, ari mu bahanzi bo mu Ntara berekanye ko bafite imbaraga n’icyerekezo cyo kwagura umuziki we.

Mu gitaramo cyo kumurika Album ye ya mbere, azafashwa n’abahanzi barimo P Fla, Fireman, Fax Rapper, Nessa na Mc Tino bazaturuka mu Mujyi wa Kigali bakajya guha uburyohe bwa muzika abanya Rusizi.

Ni igitaramo byitezwe ko kizaha ibyishimo abazacyitabira by’umwihariko abakunzi b’injyana ya Hip Hop ikunzwe muri kariya Karere.

Abahanzi b’i Rusizi barimo The Mirror Empire n’uwitwa Malizuku bari mubazaririmba ubwo iyi album izaba imurikwa ku mugaragaro.

Iyi Album ya Javanix agiye gushyira hanze, yiganjeho indirimbo zasohotse mu gihe byari bigoye ko abahanzi bakora ibitaramo.

Iriho indirimbo zamwubakiye izina nka  “Pain Killer” yakoranye Khalifan, “umuti” na Mukaddaf, “Sepera” na Bull Dogg, “Night Love” yakoranye  na The Same, “Kore” yakoranye na Nessa n’izindi zitandukanye.

Kwinjira muri iki gitaramo ni ibihumbi bibiri y’u Rwanda ahasanzwe n’ibihumbi bitanu y’u Rwanda (5000Frw) muri VIP, hazuhirizwa amabwiriza yo kwirinda icyorezo cya Covid-19.

Reba amashusho y’indirimbo Kore ya Javanix ft Nessa iri mu ziri kuri album ya mbere ya Javanix

NDEKEZI JOHNSON  / UMUSEKE.RW