Umugabo wi Mibanda muri Komine ya Rumonge mu Ntara ya Rumonge ari mu maboko ya Polisi y’Uburundi nyuma yo gufatanwa imbunda yibye ku birindiro bya Polisi yarangiza akarasa mu kirere amasasu atandatu.
Amakuru avuga ko uyu muturage yibye iyi mbunda ku birindiro bya Polisi ahitwa i Musave , byabaye kuri iki cyumweru tariki ya 02 Mutarama 2022.
Polisi ivuga ko uyu mugabo yuriye urukuta atora imbunda y’umukuru w’ibirindiro bya Polisi aha ku Musave, uyu mukuru wa Polisi kuri ibi birindiro ngo yari yagiye kugura ama “Unites” ya telefone.
Ubwo uyu mupolisi yageraga aho yasize imbunda yaje kuyibura atungurwa no kumva urufaya rw’amasasu mu kirere hafi y’ibirindiro.
Aya masasu uko ari atandatu yarashwe mu kirere nta muntu n’umwe yigize ahitana.
Igiplosi cyatangaje ko uyu mugabo yarashe mu kirere nyuma yo kubura umugore we na baramu be babiri basanzwe bafitanye amakimbirane.
Abaturage bari ahabereye iri rasa, bavuze ko uyu mugabo yarashe mu kirere mu rwego rwo gukangura abapolisi bo kuri iyo posiziyo kuko biraye cyane, ngo “bakunda gusiga imbunda aho biboneye bakajya kunywa inzoga mu giturage.”
Radio Isanganiro ivuga ko nyuma yo gutabwa muri yombi, Polisi yahise itangira iperereza ngo imenye imvo n’imvano y’ayo makimbirane ari hagati y’uwo mugabo n’umugore we.
- Advertisement -
Ukeneye kwamamaza! Gusobanuza! Gutanga amakuru? Hamagara 0788772818
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
NDEKEZI JOHNSON / UMUSEKE.RW