Amaso y’abakunzi b’umupira w’amaguru muri Afurika n’Isi muri rusange yose yari ahanzwe muri Cameroun ahatangiye kubera igikombe cy’Afurika CAN 2021 cyadindijwe n’icyorezo cya Covid-19, aho amakipe 24 agomba kwishakamo imwe izacyegukana mu minsi bagiye kumara bagihatanira. Maze Cameroon yakiriye irushanwa itangira yegukana amanota atatu imbere y’abafana bayo.
Ku gicamunsi cyo kuri iki Cyumweru, tariki 9 Mutarama 2022, amakipe 24 aturutse hirya no hino ku mugabane w’Afurika ahurira muri Cameroon aho bagiye kumara iminsi bishakamo uwegukana CAN 2021 kugeza ku wa 6 Gashyantare 2022.
Ibirori byari bitegerejwe n’abatari bake abandi amaso bayahanze televiziyo zabo ngo birebere ibirangiranwa muri ruhago nyafurika harimo n’abakinnyi b’ibihangange baturutse mu mshampiyona akomeye iburayi nka Premier League n’ahandi.
Mbere y’uko amakipe 24 y’ibihugu biri muri iri rushanwa atana mu mitwe yishakamo uzegukana CAN 2021, ahereye mu itsinda A, abantu baryohewe n’ibirori byo gufungura iri rushanwa ku mugaragaro kuri sitade Olembe. Aho byari byitabiriwe n’abanyacyubahiro barimo Perezida wa Cameroun Paul Biya na Madamu we, Perezida w’Impuzamashyirahamwe y’umupira w’amaguru ku Isi FIFA, Gianni Infatino, umuyobozi wa CAF Patrice Motsepe ndetse na Perezida w’Ishyihamwe ry’umupira w’amaguru muri Cameroun, Samuel Eto’o n’abandi banyacyubahiro.
Ku saa kumi n’ebyiri z’umugoroba z’I Kigali, nibwo amakipe yo mutsinda A yakinnye umukino ufungura irushanwa hagati ya Cameroon yakiriye irushanwa yakinaga na Burkina Faso.
Burkina Faso ntiyakanzwe n’uko Cameroon iri imbere y’abafana bayo kuri sitade Olembe, maze Gustavo Sangare afungura amazamu ku munota wa 24. Gusa Vincent Aboubakar yaje kuba ahamya bimwe umunyarwanda yavuze ko inkoko iri iwayo ishonda umukara maze yishyura igitego ku munota wa 40, maze yongera guhagurutsa abanya Cameroon ku munota wa 3 w’inyongera y’igice cya mbere.
Amakipe yagiye kuruhuka Cameroon iri imbere ya Burkina Faso 2-1, gusa igice cya kabiri ntacyo byigeze bihundura ku musaruro kuko umukino warangiye Cameroon iyoboye n’ibitego 2-1. Iba ibaye ikipe ya mbere ibonye atatu muri CAN 2021.
Mu itsinda A hakurikiyeho undi mukino wahuje Ethiopia na Cape Verde, ku saa tatu z’ijoro za Kigali. Gusa Ethiopia isa n’iyavuye mu mukino kare kuko umukinnyi wayo Yared Bayeh yaje kuba yerekwa ikarita itukuru ku munota wa 12 w’umukino, maze Cape Verde iba ibonye umwanya wo gushka insinzi, bidatinze ku munota wa 46 w’igice cya mbere Julio Tavares afungura amazamu ku mupira yari ahawe na Rodrigues Garry.
Igice cya mbere kirangira Cape Verde iyoboye umukino imbere ya Ethiopia yakinaga ari abakinnyi icumi n’igitego 1-0. Gusa igice cya kabiri cyatangiye Ethiopia yihagararaho gusa ntiyabonye uburyo yakishyura igitego yari yatsinzwe maze umukino urangira Cape Verde yegukanye atatu.
- Advertisement -
Itsinda A riba riyobowe na Cameroon, ikurikiwe na Cape Verde n’amanota atatu zose n’igitego kimwe zizigamye, naho Burkina Faso na Ethiopia zitangira ubusa bw’inota n’umwenda w’igitego.
Iri tsinda A rikazongera kujya mu kibuga ku wa 13 Mutarama 2022, aho Cameroon izatana mu mutwe na Ethiopia na Cape Verde igacakirana na Burkina Faso.
CAN 2021 yakagombye kuba yarabaye mu 2019 muri Cameroun ariko riza kwimurirwa mu Misiri kuko itari yiteguye neza, umwaka ushize nabwo ntiyababye kubera icyorezo cya Covid-19, gusa haje gushyirwaho ingamba zo gutuma iki gikombe gikinwa kuva kuri uyu wa 9 Mutarama kugeza ku wa 6 Gashyantare 2022.
Amakipe 24 agiye kwishakamo uwegukana CAN 2021, ni Algeria, Burkina Faso, Cameroon, Cape Verde, Comoros, Cote D’Ivoire, Misiri, Guinea Equatorial, Ethoipia, Gabon, Gambia, Ghana, Guinea, Guiena Bissau, Malawi, Mali, Mauritania, Morocco, Nigeria, Senegal, Sierra Leone, Sudan, Tunisia na Zimbabwe.
Ukeneye kwamamaza! Gusobanuza! Gutanga amakuru? Hamagara 0788772818