Polisi ikorera mu Mujyi wa Manchester mu Bwongereza, yatangaje ko yataye muri yombi rutahizamu wa Manchester United, Mason Greenwood, ari gukorwaho iperereza ku byaha acyekwaho byo gukubita no gufata ku ngufu uwari umukunzi we.
Ni ibyaha bivugwa ko yakoreye umukunzi we, ni nyuma y’amashusho amaze iminsi atambutswa ku mbuga nkoranyambaga agaragaza uyu mukinnyi yagize intere umukunzi we.
Polisi yagize iti “Dushobora kwemeza ko umugabo wo mu kigero cy’imyaka 20 yamaze gutabwa muri yombi akekwaho ibyaha byo gukubita no gufata ku ngufu.”
Polisi y’i Manchester ivuga ko afunzwe mu gihe iperereza rigikomeje.
Mbere y’uko atabwa muri yombi, Ikipe ya Manchester United yari yahagaritse uyu mukinnyi haba mu myitozo cyangwa imikino.
Manchester United yatangaje ko itakwihanganira urugomo urwo arirwo rwose kandi ko yamenyeshejwe ibyo birego byo ku mbuga nkoranyambaga.
Mason Greenwood yakuriye mu ikipe ya Manchester United, umukino wa mbere yawukinnye mu mwaka wa 2019, ni umwe mu bakinnyi bahamagarwa mu ikipe y’igihugu y’Ubwongereza.
NDEKEZI JOHNSON / UMUSEKE.RW