Minisitiri wa Siporo Aurore Munyangaju Mimosa yakiriye mu biro bye umunyabigwi wakanyujijeho mu ikipe ya FC Barcelona yo muri Esipanye, José María Bakero Escudero wasozaga urugendo yagiriraga mu Rwanda, baganira ku ngingo zirimo imikoranire yo guteza imbere umupira w’amaguru mu mashuri.
Mu gitondo cyo kuri uyu wa Mbere, tariki 14 Gashyantare 2022, nibwo Minisitiri Aurore Munyangaju Mimosa ari kumwe n’Umuyobozi wa FERWAFA ,Nizeyimana Mugabo Olivier yakiriye ikirangirire muri ruhago cyakanyujijeho mu ikipe ya FC Barcelona José María Bakero Escudero.
Nk’uko byatangajwe n’urukuta rwa Twitter rwa Minisiteri ya Siporo, Aurore Munyangaju Mimosa yakiriye José María Bakero Escudero umaze iminsi mu Rwanda bagiranga ibiganiro bigamije guteza imbere ruhago mu bato no mu mashuri, kuzamura urwego rw’abatoza n’ubufatanye hagati y’Ishyirahamwe ry’Umupira w’Amaguru mu Rwanda(FERWAFA) n’irya Esipanye.
Ubutumwa banyujijeho bugira buti “Muri iki gitondo Minisitiri Mimosa yakiriye mu biro bye José María Bakero Escudero wakiniye ikipe ya FC Barcelona uri mu Rwanda kuva mu Cyumweru gishize, bagirana ibiganiro by’ubufatanye na FERWAFA.
Ibiganiro byabo byibanze ku mahirwe ahari yo kubaka umupira w’amaguru mu mashuri, iterambere ry’abatoza n’imikoranire hagati ya FERWAFA na La Liga.
José María Bakero Escudero akaba ariwe ushinzwe gushakira abakinnyi ikipe ya FC Barcelona mu cyiciro cya Mbere muri Esipane.
Uyu munyabigwi wa FC Barcelona yageze mu Rwanda mu Cyumweru gishize, ku wa 7 Gashyantare 2022, José María Bakero Escudero ari kumwe na Perezida wa FERWAFA Nizeyimana Mugabo Olivier basuye amarero y’umupira w’amaguru ku mukino wahuje APR FC na Dream Team Academy.
Gusa uyu mugabo wubatse izina mu mupira w’amaguru ku ruhando mpuzamahanga yatunguwe n’abana bamweretse kuko yasanze ari bakuru cyane kuko bari hagati y’imyaka 15 na 17 kandi we yifuza abana bafite mu myaka 10.
Ibi byahamijwe na Nizeyimana uyobora FERWAFA wagize ati “Arashaka abana b’imyaka 11 kuzamura. Aho twagiye dusura yarebaga umwana akatubaza ati “ese uyu afite imyaka ingahe?”. Hari aho twageze abona umwana muto cyane aramushima aramuhamagara anamubwira ko ari rwo rugero rw’abana twari bumwereke. Inshuro nyinshi twaganiraga akambaza ati ariko aba bana ni bakuru, abato barihe?”.
- Advertisement -
José María Bakero Escudero w’imyaka 59 yavukiye Goizeuta muri Espain, yabanje gukina ikipe y’abato ya Real Sociedad aho kuva mu 1980 kugeza 1988 yari mu ikipe nkuru ayitsindira ibitego 67 mu mikino 223.
Yahavuye yerekeza muri Barcelona yatsindiye ibitego 72 mu mikino 260 yayikiniye kuva mu 1988.kugeza mu mwaka w’ 1996 aho yavuye yerekeza mu ikipe ya Veracruz yakiniye imikino 17 akayitsindira ibitego bitatu gusa. Ikipe nkuru y’igihugu ya Espain yayikiniye imikino 30 ayitsindira ibitego 7 harimo n’ibikombe by’Isi bibiri yayikiniye.
Yatoje amakipe arimo Puebla, Malaga, Real Sociedad, Polonia Warsaw, Lech Poznan na Juwan Aurich. Kuri ubu ashinzwe kurambagiriza abakinnyi Barcelona.
NKURUNZIZA Jean Baptiste / UMUSEKE.RW