Ubwongereza bwafatiye ibihano abakobwa babiri ba Perezida w’Uburusiya, Vladimir Putin harimo gufatira imitungo yabo no kubahagarika kugera muri iki gihugu.
Katerina Vladimirovna Tikhonova na Maria Vladimirovna Vorontsova, kuri uyu wa Gatantu, tariki 8 Mata 2022, nibwo bafatiwe ibihano n’Ubwongereza.
Umukobwa wa Sergeĭ Viktorovich Lavrov, Minisitiri w’Ububanyi n’Amahanga w’Uburusiya, na we witwa Yakaterina Sereyevna Vinokurova na we yafatiwe ibihano.
Mu itangazo rigenewe Abanyamakuru ryasohowe na Guverinoma y’Ubwongereza, rivuga ko aba bose bafatiwe ibi bihano mu rwego rwo kubahagarikira ingendo ndetse no gufatira imitungo yabo.
Ibi bihano bikomeje gufatirwa bamwe mu bayobozi bakuru b’Uburusiya n’abafite aho bahuriye na bo nyuma y’uko iki gihugu gishoje intambara kuri Ukraine.
Amakuru atangwa na Guverinoma y’Ubwongereza avuga ko imitungo ifite agaciro ka miliyari 275 z’Ama-Pound imaze gufatirwa n’Amahanga kubera intambara Putin yashoje.
Ibi bihano byafatiwe aba bakobwa bije byiyongera ku byo bari bafatiwe na Leta Zunze Ubumwe z’Amerika, Uburayi n’ibindi bihugu bikaba bikomeje gufatira ibihano abayobozi bakuru n’abakire b’i Moscow.
Kugeza ubu kandi imitungo y’umuherwe w’ikipe ya Chelsea yo Bwongereza na yo yamaze gufatirwa harimo n’ikipe.
Perezida w’Uburusiya Vladimir Putin yashoje intambara kuri Ukraine mu mpera za Gashyantare, aho yavugaga ko mu minsi itatu azaba yamaze gufata igihugu gusa byaje gufata indi ntera.
- Advertisement -
Kuri uyu wa Gatanu, misile ebyiri zatewe ku nzira abagenzi bategeramo gariyamoshi ahitwa Donetsk, zihitanye abagera kuri 39, abandi 87 barakomereka.
Izi misile Ukraine yavuze ko ari iz’Uburusiya, gusa Minisitiri w’Umutekano w’Uburusiya yahakanye ko izi misile ari izabo avuga ko ubu bwoko bukoreshwa na Ukraine.
Kuva Uburusiya bwatera Ukraine bushinjwa kwica bukanahohotera abasivile, gusa buhakana ayo makuru.
Ivomo: Reuters
NKURUNZIZA Jean Baptiste / UMUSEKE.RW
