Amakipe yo mu Cyiciro cya Mbere, yabengutse abakinnyi batanu ba La Jeunesse FC yo mu Cyiciro cya Kabiri.
Mu gihe shampiyona y‘Icyiciro cya Kabiri igeze aho rukomeye, ni ko amakipe yo mu Cyiciro cya Mbere yatangiye gushakamo abakinnyi bakiri bato.
Imwe mu makipe amaze kugaragaza ko afite abakinnyi beza kandi bakiri bato, ni La Jeunesse FC yo mu ku Mumena. Iyi kipe n’ubundi yamye itanga abakinnyi beza mu Cyiciro cya Mbere.
Ikipe ya Gasogi United ni yo yabimburiye izindi gusinyisha umukinnyi yakuye muri La Jeunesse FC. Iyi kipe yamaze gusinyisha Shyaka Freddy amasezerano y’imyaka itanu. Amakuru UMUSEKE wamenye avuga ko uyu musore w’imyaka 24 yatanzweho miliyoni 3Frw.
Indi kipe yifuza abakinnyi muri La Jeunesse FC, ni Gorilla FC. Iyi kipe irifuza Nzeyimana Omar ukina hagati, Nsabimana Ibrahim, Nshimirimana Olivier (Bonjour) ukina mu bwugarizi, Ishimwe Djibril uzwi ku izina rya Fuade.
Amakuru avuga ko ibiganiro birimbanyije hagati y’ubuyobozi bw’amakipe yombi kandi biri kugenda neza.
La Jeunesse FC iri ku mwanya wa Gatanu n’amanota 24 mu itsinda rya Kabiri iherereyemo. Iyi kipe yo ku Mumena yagiye izamura abakinnyi benshi nka Mugiraneza Jean Baptiste uzwi nka Miggy, Rubangura Omar ubu uyibereye umutoza mukuru, Habimana Yussuf n’abandi.
Mu mukino ubanza wa 1/8 cy’irangiza mu gikombe cy‘Amahoro, iyi kipe iheruka kunganya na Police FC 2-2. Umukino wo kwishyura uteganyijwe tariki 19 Mata, 2022.