Ikipe ya RS Berkane yo muri Maroc, biciye kuri za penaliti, yatsinze Orlande Pirates yo muri Afurika y’Epfo, yegukana igikombe cy’amakipe yatwaye ibikombe iwayo [CAF Confederation Cup].
Ku wa Gatanu [ejo hashize], hasozwaga irushanwa ry’amakipe yatwaye ibikombe iwayo kizwi nka CAF Confederation Cup. Amakipe yari yageze ku mukino wa nyuma ni RS Berkane yo muri Maroc na Orlando Pirates yo muri Afurika y’Epfo.
N umukino wabereye kuri Godswill Akpabio International Stadium mu gihugu cya Nigeria, wayobowe n’abasifuzi mpuzamahanga bari bayobowe na Janny Sikazwe ukomoka muri Zambia.
Ni umukino uteri woroshye, kuko iminota 90 yagenwe yarangiye ikipe zombi nta n’imwe irebye mu izamu ry’indi kuko zaguye miswi zinganya 0-0. Icyo byasobanuraga ni uko hagombaga gukinwa iminoya yindi 30 y’inyongera kugira ngo haboneke ibasha kwegukana igikombe.
Mu gukina iyi minota 30 ya nyuma, ku munota wa 96, Youssef El Fahli yaboneye igitego ikipe ye ya RS Berkane biciye kuri penaliti yatanzwe hitabajwe ikoranabuhanga ryunganira abasifuzi [Video Assistant Referee].
Gusa mu gihe haburaga iminota itatu gusa ngo uyu mukino urangire, Thembinkosi Lorch ukomoka muri Afurika y’Epfo yaboneye igitego Orlando Pirates igitego cyo kwishyura, maze iminota yari isigaye buri kipe iyicunga neza, umukino urangira zombi zinganya igitego kimwe ku kindi.
Icyari gikurikiyeho, kwari ukujya gukizwa na za penaliti, maze RS Berkane yinjiza izayo uko ari eshanu, mu gihe Orlando Pirates yo yahushije imwe ikinjiza enye, iyi kipe yo muri Maroc yegukana igikombne gutyo.
Umutoza mukuru wa RS Berkane, Florent Ibenge ukomoka muri Repubuloka Iharanira Demokarasi ya Congo, yahesheje iyi kipe igikombe cya Kabiri nyuma yo kucyegukana mu 2019-2020.
RS Berkane yari yageze ku mukino wa nyuma isezereye TP Mazembe yo muri RDC ku giteranyo cy’ibitego 4-2 mu mikino yombi. Ni mu gihe Orlando Pirates yo yahageze isezereye Al Ahly Tripoli yo muri Libya ku giteranyo cy’ibitego 2-1, ku giteranyo cy’imikino yombi.
- Advertisement -
ABAKINNYI BABANJE MU KIBUGA KU MPANDE ZOMBI
RS Berkane XI: HamianiAkbi, El Moussaoui, Dayo, Mokadem, Baadi, Oubila, Naji, El Helali, El Fahli, El Bahri, Lukombe.Abasimbura: El Bahraoui, Camara, Zghoudi, Regragui, El Moudane, El Ouaad, Aziz, Kisinda, Namsaoui.
Orlando Pirates XI: Ofori, Jele, Maela, Ndah, Shandu, Dlamini, Motshwari, Mosele, Lorch, Peprah, Hotto. Abasimbura:Mpontshane, Hlatshwayo, Ndlovu, Monare, Makaringe, Nyauza, Mabasa, Mntambo, Dzvukamanja.
NKOMEJE GUILLAUME/UMUSEKE.RW