Ikipe ya FC Barcelona nyuma yo gutsindwa na Girona ibitego 4-2, byatumye ikipe ya Real Madrid ihita itwara Igikombe cya shampiyona y’icyiciro cya Mbere muri Espagne, La Liga.
Kuri uyu wa Gatandatu hakinwaga imikino y’umunsi wa 34 muri Shampiyona y’ikiciro cya Mbere muri Espagne.
Ni imikino yari gusiga Real Madrid itwaye Igikombe cya Shampiyona hakiri kare cyangwa ikazategereza, undi munsi.
Ikipe ya Real Madrid batazira ‘Los Blancos’ niyo yabanje gukina, Saa Kumi na 15 aho yakinaga na Cadiz FC, birangira Real Madrid itsinze ibitego 3-0.
Abasore ba Carlo Ancelotti batsinze ibyo bitego ni Ibrahim Diaz ku munota wa 51, Jude Bellingham ku munota wa 68 na Joselu ku munota wa 93 w’umukino.
- Advertisement -
Gutsinda kwa Real Madrid byari bivuze ko yagombaga gutegereza ibiva mu mukino wari guhuza FC Barcelona na Girona ngo imenye niba itwara Igikombe cya Shampiyona hakiri kare mu gihe Barcelona yaba yatsinzwe.
FC Barcelona ntiyabashije gutsinda Girona, kuko ibitego bibiri yabonye bitsinzwe na Andreas Christensen na Robert Lewandowski bitari bihagije ngo bikuremo ibitego bine Girona yabatsinze.
Gutsindwa kwa FC Barcelona byahise bituma Real Madrid itwara Igikombe cya shampiyona ya Espagne umwaka w’imikino wa 2023-2024 mu gihe hakibura imikino ine.
Kugeza ubu mu mikino 34 imaze gukinwa Real Madrid ifite amanota 87, Girona ya kabiri ikagira 74 mu gihe FC Barcelona ya gatatu ifite amanota 73.
Ibi bivuze ko ikipe ya Real Madrid batazira iy’Ibwami itwaye Igikombe cya shampiyona ku nshuro ya 36 mu mateka yayo.
MUGIRANEZA THIERRY / UMUSEKE.RW