Kiyovu Sports ikomeje kuzira kuba impfubyi ya shampiyona

Ikipe ya Kiyovu Sports yahabwaga amahirwe yo kwegukana igikombe cya shampiyona y’uyu mwaka, ikomeje kugorwa no kuba nyakamwe, mu gihe iyo bahanganye umubano ari mahwi hagati yayo n’iziyifasha.

Mu gihe urugamba rwo gushaka igikombe cya shampiyona rukomeje, ni ko ikipe zigihanganiye [Kiyovu na APR FC] zikomeje kwirwanaho mu buryo bumwe cyangwa ubundi.

Gusa uku kwirwanaho kw’aya makipe yombi, imwe [Kiyovu]muri zo ikomeje kubihomberamo kuko ifatwa nk’impfubyi yimenya kuri buri kimwe ukurikije n’imbaraga iyo bahanganye [APR FC] ifite ndetse n’umubano ibanyemo n’ikipe ifatwa nka murumuna wa yo [Marines FC].

Ibijya gushya birashyuha, ni ko Abanyarwanda mu buhanga bwabo bavuze. Uyu mugani ucibwa iyo hashaka kugaragazwa ko iyo hari ikintu kigiye kuba, haba hari ibimenyetso bikigaragaza.

Kiyovu Sports ijya kuva ku mwanya wa Mbere, yatsinzwe na Gasogi United ibitego 2-0 mu mukino w’umunsi wa 23 wabereye kuri Stade ya Kigali tariki 15 Mata.

Iyi kipe yo ku Mumena ubwo yatsindwaga, yarushaga amanota abiri ikipe ya APR FC, ku munsi wakurikiyeho yo yahise ibona amanota atatu kuri Bugesera FC yatsindiye ku kibuga cya yo igitego kimwe ku busa cyatsinzwe na Mugisha Bonheur uzwi nka Casemiro.

Kuva ubwo, ikipe y’Ingabo yahise ishyira ikinyuranyo cy’inota rimwe hagati yayo na Kiyovu Sports. Kuva kuri uwo munsi wa shampiyona, izi kipe zakomeje gukurikirana kugeza ubwo hagiyemo ikinyuranyo cy’amanota atatu nyuma y’aho Urucaca ruguye miswi na Bugesera FC 0-0, nyamara APR FC yatsinze Espoir FC mu buryo bworoshye ibitego 3-2 mu mikino y’umunsi wa 26 wa shampiyona.

Bamwe bakurikiranira hafi shampiyona y’u Rwanda, bahamya ko Kiyovu Sports mu gihe yaba ibuze iki gikombe cya shampiyona, byazayigora mu yindi myaka izakurikiraho, ariko kandi bakavuga ko kimwe mu byo yaba izize ari uko ari nyakamwe mu gihe iyo bahanganye ikoresha imbaraga z’umurengera.

Imwe mu makipe agarukwaho mu gufasha iyi kipe y’Ingabo, ni Marines FC nk’ikipe y’Ingabo zirwanira mu mazi ifatwa nk’umuvandimwe wa APR FC n’ubwo Ubuyobozi bwo butabikozwa ndetse bubyamaganira kure.

Iyi kipe y’Ingabo zirwanira ku butaka, yatsinze Kiyovu Sports igitego kimwe ku busa mu mukino ubanza wa shampiyona, inayisezerera mu gikombe cy’Amahoro muri 1/8 cy’irangiza, ndetse myugariro Ngendahimana Eric umwe mu beza b’iyi kipe yo ku Mumena, avunikira ku mukino ubanza kugeza magingo aya ntabwo aragaruka mu kibuga nyamara yari umwe mu bayifashije cyane mu bwugarizi bwayo.

Abavuga ibi kandi, basesengura shampiyona y’u Rwanda kuri buri kimwe kiyiberamo, aho bamwe batanatinya kuvuga ibibamo ari umwanda nk’uko na perezida wa Gasogi United, Kakooza Nkuriza [KNC] aheruka kubivuga ubwo yari mu bihano bya FERWAFA.

Umwe mu bakurikirana ikipe ya Étoile de l’Est FC ariko utashatse ko amazina ye ajya hanze, yabwiye UMUSEKE ko iyi kipe yoroheje umukino wo kwishyura wa shampiyona wayihuje na APR FC kuri Stade ya Kigali, maze igatsindwa ibitego 3-1 ariko nayo ikaba yari itegereje kandi yizeye neza amanota atatu ya Marines FC y’umunsi wa 26 nk’uko byagenze ubwo iyi kipe yo mu Akarere ka Ngoma igatsinda ibitego 2-0.

Umwe mu baba hafi cyane y’ikipe ya Bugesera FC, yemereye UMUSEKE ko iyi kipe ubwo yari iri gutegura umukino wo kwishyura wa Kiyovu Sports bari bananganyije umukino ubanza [1-1], abakinnyi ndetse n’umutoza bahawe ibirenze ibyo bari basanzwe bahabwa ndetse bagasabwa kudatakaza uyu mukino kugeza aho bashyirirwaho agahimbazamusyi kadasanzwe mu gihe baba babashije kudatsindwa uyu mukino kandi babigezeho ubwo bagabanaga amanota bakanganya 0-0.

Abandi baganiriye na UMUSEKE, bavuze ko hari imikino ibiri APR FC iheruka gutsinda ariko mu buryo bwasize benshi bibaza kuri izo ntsinzi. Iyo mikino ni uwa Marines FC wo kwishyura iyi kipe yatsinze ibitego 2-0 n’uwa Étoile de l’Est FC yatsinzemo ibitego 3-1 mu mukino wagaragayemo abanyezamu babiri bose batanze ubwasisi bw’imipira yavuyemo ibitego.

Mbere y’ibi kandi, umutoza wa Kiyovu Sports, Haringingo Francis Christian yari aherutse gutanga ikiganiro ku banyamakuru avuga ko abasifuzi batari kubanira ikipe abereye umutoza, akurikije uburyo abakinnyi bakorerwa amakosa ariko abayabakoreye ntibabihanirwe mu buryo bukwiye.

Shampiyona isigaje imikino ine ngo ishyirweho akadomo. APR FC isigaje guhura na AS Kigali, Police FC, Gorilla FC na Kiyovu Sports bazihurira. Kiyovu Sports yo isigaje guhura na Espoir FC i Rusizi, APR FC, Marines FC na Étoile de l’Est FC iri mu mazi abira. Ikipe y’Ingabo iri ku mwanya wa Mbere n’amanota 60, mu gihe Urucaca ruri ku mwanya wa Kabiri n’amanota 57.

UMUSEKE.RW