Ikipe ya Kiyovu Sports yongeye kugusha imvura y’ibitego itababariye Rutsiro Fc yanyagiye 4-0 ku munsi wa 25 wa shampiyona y’icyiciro cya mbere mu bagabo mu Rwanda.
Ni mu mukino wabaye kuri uyu wa 02 Mata 2022 mu Karere ka Rubavu kuri Stade Umuganda, iyo Kiyovu itsikira urugendo rugana igikombe rwari kuyibera inzira y’umusaraba.
Muri uyu mukino abahungu b’i Kampala berekanye ko bari mubahagaze neza muri shampiyona y’uRwanda, Emmanuel Arnold Okwi na Muzamiru Mutyaba bakomeje kwerekana ko atari insina ngufi.
Ibitego bya Kiyovu Sports byatsinzwe na Muzamiru Mutyaba, Emmanuel Arnold Okwi, Bigirimana Abedi na Ishimwe Saleh winjiye mu kibuga asimbuye.
Umurundi Bigirimana Abedi amaze gutsinda igitego 10 muri iyi shampiyona igeze mu mahina.
Uretse umukino uzahuza aya amakipe yombi, ikipe ya APR FC isigaje gukina na Espoir FC, Gorilla FC, AS Kgali na Police FC naho Kiyovu isigaje gukina na Bugesera FC, Etoile de l’Est FC, Espoir FC na Marines FC.
Indi mikino y’umunsi wa 25 yabaye, Marines FC na Musanze FC zanganyije 0-0, AS Kigali itsinda Gasogi United ibitego 2-1, Bugesera FC itsinda Espoir FC igitego1-0. Ikipe ya Gicumbi FC yatsindiwe mu rugo na Etincelles FC igitego 1-0, Mukura inganya na Gorilla FC igitego 1-1 naho Police FC inganya na Rayon Sports igitego 1-1.
Nyuma y’imikino y’umunsi wa 25, APR FC ikomeje kuyobora urutonde n’amanota 57, ikurikiwe na Kiyovu n’amanota 56, ku mwanya wa 3 hari Rayon Sports n’amanota 42, ku mwanya wa 4 hari AS Kigali n’amanota 40.
- Advertisement -
Etoile de l’Est iherutse gutsindwa na APR Fc ibitego 3-1 bitavuzweho rumwe, iri mu marembo agana icyiciro cya kabiri mu gihe Gicumbi Fc iri kumwanya wa nyuma yamaze gukatisha itike yo kuzakina umwaka utaha shampiyona y’icyiciro cya Kabiri mu Rwanda.
NDEKEZI JOHNSON / UMUSEKE.RW