Umutoza mukuru wa Dodoma Jiji FC yo muri Tanzania, Masudi Djuma, yafatiwe ibihano byo kumuhagarika imikino itatu nyuma yo kurwana n’umukinnyi we.
Ku wa Kabiri tariki 17 Gicurasi, hamenyekanye amakuru yavugaga ko Ishyirahamwe ry’Umupira w’Amaguru muri Tanzania [TFF], ryahagaritse umutoza Masudi Djuma n’umukinnyi we, Jamali Mtegeta.
Aba bombi bahaniwe ko barwanye ubwo ikipe ya Dodoma Jiji yari iri gukina na Biashara United mu mukino w’umunsi wa 24 wa shampiyona wabereye kuri Stade ya Nyamagana, Mwanza.
Nk’uko ibinyamakuru byo muri Tanzania bibivuga, Masudi Djuma na Jamali Mtegeta bombi bahagaritswe imikino itatu, banacibwa amande yo gutanga ibihumbi 500 by’amashilingi buri umwe [Sh 500,000].
Amakuru avuga ko Masudi yakubise umutwe uyu mukinnyi wari ku ntebe y’abasimbura, nyuma y’ubushyamirane bwabanje kubaho hagati y’aba bombi.
Dodoma Jiji FC iri ku mwanya wa 11 n’amanota 28 mu mikino 24 imaze gukina.
HABIMANA SADI/UMUSEKE.RW