Umunyemari Félicien Kabuga, ukekwaho uruhare muri Jenoside yakorewe Abatutsi mu 1994 nta nzitizi n’imwe imubuza gukurikiranwa nk’uko byemejwe n’Urwego rwashyizweho kurangiza imanza za Jenoside rusimbuye Urukiko rwa Arusha.
Urwego rwa IRMCT (International Residual Mechanism for Criminal Tribunals) rwatangaje ku wa Mbere tariki 13 Kamena, 2022 ko Kabuga nta kabuza azaburana kandi mu gihe cya vuba.
Urugereko rwo ku rwego rwa mbere rwanzuye ko abunganira Kabuga nta bimenyetso simusiga bagaragaje basobanura impamvu ataburanishwa.
Abunganira Félicien Kabuga mu Gicurasi, 2021 bari basabye ko urubanza rwe ruhagarikwa kubera ko ubuzima bw’umukiliya wabo butameze neza.
Kabuga yafashwe tariki 16 z’ukwezi kwa Gatanu, 2020 mu mujyi wa Paris nyuma y’imyaka myinshi yari abayeho yihishahisha.
Akekwaho uruhare mu gushinga umutwe w’Interahamwe wishe Abatutsi mu gihe cya Jenoside yabaya mu 1994, ikagwamo Abatutsi barenga miliyoni.
Ubu uyu musaza w’imyaka 87 afungiye i La Haye, mu Buholande ategereje kuburanishwa n’Urwego rwa IRMCT.
UMUSEKE.RW