Mbere yo guhura n’ikipe ya APR FC, ikipe ya US Monastir yo muri Tunisia, yaguze rutahizamu Firmin Ndombe Mubele wakinnye mu Cyiciro cya Mbere mu Bufaransa.
Ikipe zizakina amarushanwa Nyafurika ya CAF Champions League na CAF Confederation Cup, akomeje kwiyubaka ashaka abakinnyi bazayafasha kwitwara neza muri ako kazi kayategereje.
US Monastir yo muri Tunisia, yabanje kurangizanya na rutahizamu ukomoka muri Répubulika Iharanira Demokarasi ya Congo, Firmin Ndombe Mubele.
Nk’uko ibinyamakuru bitandukanye byo muri iki gihugu [DRC] bibivuga, uyu rutahizamu w’imyaka 28 yamaze gusinyira iyi kipe kuri igisigaye ari ukwerekanwa ku mugaragaro.
Firmin yakinnye mu Cyiciro cya Mbere mu Bufaransa mu makipe arimo Stade Rénnais na Toulouse FC. Yakiniye FC Astana yo muri Kazakhstan, AS Vita Club y’iwabo, Al Ahli SC yo muri Arabie Saoudite n’izindi.
Ubwo yari mu Bufaransa, yahatsinze ibitego icumi mu mikino 60 yahakinnye kuva mu 2018-2020.
Uyu rutahizamu yakinnye amarushanwa akomeye arimo ayo gushaka itike yo kujya mu gikombe cy’amakipe yabaye aya Mbere iwayo [Uefa Champions League qualifiers], shampiyona y’u Bufaransa [Ligue 1], Europa League, CAF Champions League n’izindi.
UMUSEKE.RW