Umuryango w’Abarokotse ubwicanyi bw’intambara y’iminsi itandatu ya Kwisangani, muri Repubulika Iharanira Demokarasi ya Congo, barasaba impozamarira.
Ku wa kabiri tariki ya 13 Nzeri, 2022, basabye Guverinoma ya Congo amafaranga y’impozamarira angana na Miliyoni 65 z’amadorari.
Muri Gashyantare uyu mwaka, Uganda yategetswe kwishyura Repubulika ya Demokarasi ya Congo miliyoni 325 z’amadolari y’Amerika kubera uruhare yagize mu ntambara muri icyo gihugu.
Urukiko mpuzamahanga rwa ONU, ruzwi nka International Court of Justice (ICJ), rwanzuye ko Uganda yarenze ku masezerano mpuzamahanga ubwo yafataga ubutaka bwa Congo hagati y’umwaka wa 1998 na 2003.
Abacamanza basanze Uganda ari yo yateje imfu z’abantu bari hagati ya 10,000 na 15,000 mu ntara ya Ituri mu burasirazuba bwa DR Congo.
Abacamanza banasanze ingabo za Uganda zarasahuye zahabu, diyama n’ibiti bivamo imbahu z’agaciro bizwi nka timber.
ICJ yategetse Uganda kuriha ayo mafaranga mu byiciro bitanu, buri mwaka igatanga miliyoni 65 z’amadolari y’Amerika, hagati y’uyu mwaka wa 2022 n’uwa 2026.
Icyiciro cya mbere Uganda yacyishyuye muri uku kwezi kwa cyenda.
Izo miliyoni 325 z’amadolari y’Amerika zikubiyemo: miliyoni 225 z’amadolari y’Amerika z’indishyi ku bantu, miliyoni 40 z’amadolari y’Amerika z’indishyi ku mitungo yangijwe, miliyoni 60 z’amadolari y’Amerika z’indishyi ku mitungo yasahuwe.
- Advertisement -
Ukuriye ishyirahamwe ry’abarokotse ubwicanyi, Bernard Kalombola, yashimiye Perezida Felix Tshisekedi ku mbaraga yakoresheje mu biganiro na Uganda, kugira ngo miliyoni 65$ za mbere ziboneke.
Uyi muyobozi yavuze ko abarokotse ubwicanyi basaba Guverinoma ko “Yakora ibishoboka byose amafaranga yatanzwe akagezwa mu kanama gashinzwe kugeza impozamarira ku barokotse, ari na bo bagenerwabikorwa.”
Ku wa 9 Nzeri uyu mwaka Congo nibwo yatangaje ko tariki ya 01 Nzeri yakiriyiye icyiciro cya mbere cy’amadolari nk’uko Urukiko rwa ICJ rwabitegetse.
TUYISHIMIRE Raymond /UMUSEKE.RW