Imfungwa zirenga 100 zari zifungiye muri Gereza ya Suleja iherereye mu Majjaruguru y’umurwa Mukuru wa Nigeria, Abuja, zatorotse aho zari zifungiye nyuma y’uko imvura isenye urukuta rwaho bari bafungiye.
Aya makuru yatangajwe n’urwego rushinzwe amagereza muri Nigeria (Nigerian Correctional Service) mu itangazo rwasohoye ruvuga ko imvura nyinshi yaguye yasenye urukuta rw’inyubako za Gereza zishaje bigatuma imfungwa 118 zitoroka.
Uru rwego rugasaba abaturage gutuza kuko rwatangiye gufata abo bari batorotse.
Gutoroka amagereza muri Nigeria ni ibintu bihasanzwe cyane, nko mu 2021 imfungwa 2000 zatorotse Gereza ubwo abarwanyi bitwaje intwaro bagabaga igitero kuri Gereza iherereye muri Leta ya Imo.
Mu gihe mu 2022, abarwanyi ba Boko Haram bateye Gereza iherereye Abuja bakabohoza imfungwa 300 zirimo abarwanyi bayo.
MUGIRANEZA THIERRY / UMUSEKE.RW