Mu mukino usoza umwaka w’imikino muri Basketball 2021/2022 [All Star Game], ikipe ya Axel Mpoyo ukinira REG BBC yatsinze iya Hagumintwali Steve ukinira Patriots BBC ku manota 126-116.
Muri BK Arena hari abayobozi mu nzego zitandukanye, barimo Madame Jeannette Kagame, Minisitiri wa Siporo, Munyangaju Aurore Mimosa, perezida w’Ishyirahamwe Nyarwanda ry’Umukino wa Basketball, Ferwaba, Mugwiza Désire n’abandi.
Uyu mukino ntabwo abakinnyi bigeze bashyiramo guhangana, cyane ko atari n’irushanwa. Abakinnyi b’impande zombi nta bwitange bigeze bashyiramo ndetse buri kipe yarekaga ngenzi yayo igatsinda amanota.
Gusa ikipe ya Axel Mpoyo niyo yakunze gutsinda amanota atatu kenshi biciye kuri Adonis Filler usanzwe akinira REG BBC. Ku ikipe ya Hagumintwali Steve, Ndizeye Dieudonné niwe wageregezaga gutsinda amanota atatu ariko ntibyari bihagije.
Umukino waje kurangira ikipe ya Axel Mpoyo yegukanye intsinzi ku manota 126-116.
Ikipe ya Mpoyo Axel irimo: Mpoyo Axel [kapiteni], Gray Kendall, Filer J. Adonis, Thomas Jr Cleveland, Nshobozwabyosenumukiza Jean Jacques Wilson, Shyaka Olivier, Sangwe Armel, Kaje Elie, Niyonkuru Pascal, Nkusi Arnaud, Kabare Hubert na Munyeshuri Thierry.
Ikipe ya Hagumintwali Steve irimo: Hagumintwali Steve [kapiteni], Ndizeye Dieudonné, Ntore Habimana, Perrière Steven, Beleck Bell Engelbert, Wamukota Bush, Uwitonze Justin, Kubwimana Kazingufu Ally, Aganze B. Espoir, Kamnooh Betouoji Frank, Muteba Trésor na Turatsinze Olivier.
UMUSEKE.RW