Mu mukino wa Gatanu wa kamarampaka, ikipe ya REG Basketball Club yegukanye igikombe cya shampiyona nyuma yo gutsinda Patriots Basketball Club ku manota 84-74.
Ni umukino wabaye ku Cyumweru tariki 18 Nzeri 2022, ubera muri BK Arena ariko unitabirwa n’abakunzi ba Basketball bari benshi.
Ikipe ya REG BBC yari hejuru ukurikije umukino wa Kane yari yatsinzwe na Patriots BBC.
Abarimo Minisitiri wa Siporo, Munyangaju Aurore Mimosa, perezida w’Ishyirahamwe Nyarwanda rya Basketball, Mugwiza Désire n’abandi.
Agace ka Mbere iyi kipe yagatsinze ku manota 24-13. Agace ka Kabiri amakipe yombi yakanganyije ku manota 18-18, aka Gatatu REG yongera kugatsinda ku manota 18-17, aka Kane amakipe yombi akanganya 25-25.
Bamwe mu bakinnyi bafashije cyane ikipe ya REG BBC, harimo Adonis Filer Jovon, Tom Clevelend na Wamukota Bush.
Mu gihe bamwe mu bari bitezwe gufasha Patriots BBC, barimo Ntore Habimana na Kenneth Gasana batigeze bayiha byinshi nk’uko byari byitezwe.
Ikipe ya REG yegukanye igikombe gutyo, ihita ibona itike yo kuzakina irushanwa rya Basketball Africa League [BAL] umwaka utaha.
Ikipe yegukanye igikombe yahawe imidari, igikombe ndetse inahabwa sheke ya miliyoni 15 Frw, mu gihe Patriots yabaye iya Kabiri yahembwe miliyoni 7.5 Frw, APR BBC yabaye iya Gatatu ihembwa imidari na sheki ya miliyoni 3.5 Frw.
- Advertisement -
Mu bagore, ikipe ya REG WBBC yegukanye igikombe, ihembwa imidari, igikome na sheke ya miliyoni 10 Frw, mu gihe APR WBBC yabaye iya Kabiri yahembwe imidari na sheki ya miliyoni 5 Frw.
UMUSEKE.RW