UPDATE: M23 iravuga ko yafashe uduce twa Kalengera, Gako, Rubare, Rangira, Burayi, Rukoro, Matebe, na Kanombe duherereye ahitwa Gisigari mu bilometero bike hafi y’ikigo cya gisirikare cya Rumangambo.
Ndetse M23 ivuga ko yafashe imisozi ya ya Ngugo, iri ahitwa Rugari.
Inkuru yabanje: Imirwano ikomeye yabereye ahitwa Gako na Kalengera, ndetse inyeshyamba za M23 zatangaje ko ari zo zigenzura umuhanda mukuru, Goma-Rutshuru.
M23 ivuga ko Perezida Félix A. Tshisekedi azicuza kwanga kuganira n’inyeshyamba.
Urubuga la Republique.net rwo muri Congo ruvuga ko imirwano yatangiye saa kumi n’imwe mu gitondo (5h00 a.m) kuri uyu wa Kane tariki 27 Ukwakira, 2022 ibera mu gace ka Kanombe na Nyesisi, muri Gurupema ya Kisigari.
Iki kinyamakuru kivuga ko inyeshyamba za M23 zafashe umuhanda uhuza Rutshuru n’Umujyi wa Goma, ziwufungira ahitwa Kalengera na Kako.
Sosiyete civile muri kariya gace ivuga ko umubare w’impunzi ukomeje kwiyongera, bamwe barahungira i Goma, abandi barerekeza Rutshuru Centre.
Congo yasubije u Rwanda, irushinja “kubuza ingabo zayo kurwanya umwanzi”
- Advertisement -
Amakuru aravuga ko Radio Umudiho FM ikorera muri Rucuru (Rutshuru) yahagaritse ibiganiro byayo muri iki gihe inyeshyamba zisumbirije Rutshuru.
Urubuga l’Actualite rwo ruvuga ko imirwano hagati ya FARDC na M23 iri kubera ahitwa Chumirwa, kuri Km 4 gusa ku muhanda mukuru, RN2, hafi y’agace ka Ntamugenga muri Teritwari ya Rutshuru.
Indi mirwano ikaba ibera mu misozi yegereye Kalengera, ku ruhande rwerekera ahitwa Kibunge.
Sosiyete Civile ivuga ko inyeshyamba za M23 zigenzura uduce twa Kanombe, Nyesisi, na Gugo muri Gurupema ya Kisigari.
Iyi mirwano imaze icyumweru, imbunda zidaceceka, isasu ryabira muri Teritwari ya Rutshuru. Inyeshyamba za M23 zivuga ko ingabo za Leta, FARDC na FDLR ari bo batangiye ibitero mu duce zigenzura, naho FARDC ikavuga ko inyeshyamba za M23 (ishinja u Rwanda kuziba inyuma) ari zo zatangije intambara.
UMUSEKE.RW
