Abasirikare babiri bafite ipeti rya Colonel mu ngabo za Congo, mu cyumweru gishize bagejejwe mu rukiko rwa gisirikare rw’Intara ya Kivu ya Ruguru bashinjwa uruhare mu ifatwa ry’umujyi wa Bunagana, waguye mu maboko y’inyeshyamba za M23 mu mezi ane ashize.
Col Désiré Lobo na Col Jean-Marie Diadia wa Diadia bari bakuriye ingabo za bataillon 3412 na 3307 bararegwa ibyaha bine birimo guhunga imbere y’umwanzi, guta intwaro ndetse n’ibindi bikoresho, Kurenga ku mabwiriza ya gisirikare no gushaka kwigarurira imitungo y’abaturage nk’uko radio okapi yabitangaje.
Bivugwa ko aba basirikare, ubu bafungiye muri gereza ya Munzenze, bombi bari bakuriye ibikorwa bya gisirikare mu gace k’imirwano inyeshyamba zafatiyemo umujyi wa Bunagana.
Radio Okapi ivuga ko mu iburanisha ryabaye ku wa Gatatu ushize, abunganira abaregwa basabye ko barekurwa by’agateganyo kuko bagaragaza ko barwaye.
Aba basirikare bafunzwe kuva muri Nyakanga, 2022 urubanza rwabo ruzakomeza ku wa Gatatu w’iki cyumweru, tariki ya 19 Ukwakira, 2022.
Ibyaha baregwa bibahamye bashobora gukatirwa igihano cy’urupfu.
ISOOKO: Radio Okapi
TUYISHIMIRE Raymond /UMUSEKE.RW