Rutahizamu w’Umunya-Portugal, Cristiano Ronaldo, yaciye agahigo ko kuzuza abamukurikira ku muyoboro wa Instagram bangana na miliyoni 500.
Ubusanzwe hamenyerewe ko aca uduhigo mu gukina kuko azwiho gutsinda ibitego byinshi, binatuma ahorana uduhigo twihariye.
Kuri ubu uyu rutahizamu w’imyaka 37, yongeye guca akandi gahigo ko kuba umuntu wa Mbere ku Isi wujuje abamukurikira benshi kuri Instagram nyuma yo kuzuza miliyoni 500 z’abamukurikira.
Uwa Kabiri ukurikirwa n’abantu benshi ku Isi, ni Lionel Messi ukurikirwa n’abarenga miliyoni 376. Ku mwanya wa Gatatu haza umunyamideli, Kylie Jenner ukurikirwa n’abangana na miliyoni 372.
CR7 mbere yo kwerekeza muri Qatar mu gikombe cy’Isi, yavuze byinshi kuri Manchester United no ku mutoza mukuru wa yo, Erik ten Hag ndetse bishobora no kumuviramo gutandukana na yo.
UMUSEKE.RW