Ubwo hasozwaga irushanwa ryo kwizihiza Umunsi w’Intwari uba tariki 1 Gashyantare, ikipe y’Intwari za Gasabo mu bagabo na Bugesera mu bagore, zegukanye igikombe cy’iri rushanwa mu mukino wa Volleyball ikinwa n’abafite ubumuga [Sitting Volleyball].
Ni irushanwa ryakiniwe kuri Club Rafiki ku wa Gatandatu tariki 4 Gashyantare 2023 guhera Saa tatu za mu gitondo [09h].
Iri rushanwa ryateguwe n’Ishyirahamwe Nyarwanda ry’Imikino y’Abafite Ubumuga, NPC, n’Urwego rushinzwe Intwari ku rwego rw’Igihugu, CHENO.
Iri rushanwa ryahuje amakipe ane mu bagabo n’ane mu bagore yabaye aya mbere umwaka ushize. Izari zitabiriye mu bagabo ni Rutsiro, Gasabo, Gisagara na Karongi. Mu bagore ni Gicumbi, Musanze, Nyarugenge na Bugesera.
Buri kipe yahuye n’indi, hasigara ebyiri muri buri cyiciro ari na zo zakinnye umukino wa nyuma, maze ikipe yari ihagarariye Akarere ka Gasabo ari Intwari za Gasabo, yegukana igikombe itsinze Gisagara amaseti 3-0, mu gihe mu bagore cyegukanywe na Bugesera yatsinze Gicumbi amaseti 3-0.
Mu bagabo, Gisagara yaje ku mwanya wa Kabiri mu gihe Rutsiro yaje ku mwanya wa Gatatu. Mu bagore, Gicumbi yaje ku mwanya wa Kabiri, Nyarugenge iza ku mwanya wa Gatatu.
Perezida wa NPC, Murema Jean Baptiste unakinira ikipe y’Intwari za Gasabo, yavuze ko bishimira uko iri rushanwa ryagenze ariko by’umwihariko agashimira amakipe yose yaryitabiriye.
Ati “Mwabonye ko byagenze neza. Iki ni igikorwa kiba gikomeye cy’Ubutwari kandi Ubutwari buri Munywarwanda wese aba agomba kubugiramo uruhare. Rero ubutumwa twumviye aha bwatanzwe bunafasha na ba bakinnyi bakiri n’urubyiruko abenshi, kugira ngo birinde ibibi byose bishobira kubasubiza inyuma. Rero twabyishimiye kandi twumva dufite umuhate wo kuzakomeza.”
Irushanwa ryo Kwibuka Intwari, risanzwe ari ngarukamwaka.
- Advertisement -
UMUSEKE.RW