Umukinnyi w’ikipe ya Innovatec, Niyonkuru Samuel yahize bagenzi be yegukana isiganwa ry’amagare ryazengukaga Umujyi wa Rubavu, Kivu Belt Race.
Ni isiganwa ryatangiye Saa mbiri za mu gitondo, hasiganwa abakiri bato mu byiciro byombi (Cadets&Cadettes).
Iri siganwa ryitabiriwe n’abayobozi batandukanye barimo Meya w’Akarere ka Rubavu, Kambogo Ildephonse, Perezida w’Ishyirahamwe Nyarwanda ry’Umukino w’Amagare, Ferwacy, Murenzi Abdallah n’abandi.
Mu cyiciro cy’abagore basiganwaga ku ntera y’Ibilometero 78.1 (KM 78.1), Nirere Xaverine yabaye uwa mbere, Mukashema Josiane aza ku mwanya wa Kabiri mu gihe Mwamikazi Djazillah yabaye uwa Gatatu.
Abahungu bakuru n’abatarengeje imyaka 23 (U23) basiganwaga ku ntera y’Ibilometero 120.7 (KM 120.7), maze mu Cyiciro cy’abakuru, Niyonkuru Samuel aza ku mwanya wa mbere, akurikirwa na Muhoza Eric, mu gihe Étienne wa Benediction y’i Rubavu yaje ku mwanya wa Gatatu.
Icyiciro cy’abangavu (Women Junior), basiganwe ku ntera y’Ibilometero 63.9 (KM 63.9), maze abakinnyi bane ba Bugesera Cycling Team bayobowe na Byukusenge Mariatha, UWERA Aline, Iragena Charlotte na Ingabire Domina, baza imbere.
Mu cyiciro cy’abato mu bakobwa, batatu ba mbere bose bayobowe na Niyokwizerwa Clèmentine, Ishimwe Françoise na Muramutsa Déborah.
Mu bahungu bakiri bato, Byusa Pacific wa Les Amis Sportif ni we wabaye uwa mbere, akurikirwa na Niyotwizera Lambert wa Cine Elmay na Gisubizo Issa wa Les Amis Sportif wabaye uwa Gatatu.
Meya w’Akarere ka Rubavu, Kambogo Ildephonse, yavuze ko Umujyi wa Rubavu ukomeje kuba agace k’imikino kandi ari ikintu buri muturage uhavuka akwiye kwishimira.
- Advertisement -
Umuyobozi w’Ishyirahamwe Nyarwanda ry’Umukino w’Amagare, Ferwacy, Murenzi Abdallah, yavuze ko bishimira kandi batewe ishema n’abakiri bato batanga icyizere muri uyu mukino.
HABIMANA SADI / UMUSEKE.RW
