Nyuma yo kuba abo bakinanye bahamya ko ari umukinnyi mwiza Isi yatunze kugeza magingo aya, Mesut Özil wahagaritse gukina umupira w’amaguru, azibukirwa kuri byinshi mu makipe nka Arsenal, iy’igihugu cy’u Budage n’izindi yakiniye.
Ku wa Gatatu tariki 22 Werurwe 2023, ni bwo Mesut Özil abicishije ku mbuga nkoranyambaga, yatangaje ko ahagaritse gukina umupira w’amaguru ndetse agiye kwita ku muryango we.
Uyu mugabo w’imyaka 34, yaciye mu makipe atandukanye arimo atatu y’iwabo mu Budage, imwe yo muri Éspgane, imwe yo mu Bwongereza n’ebyiri zo muri Turquie.
Bimwe byo kumenya kuri Özil:
Yakinnye imikino 645 nk’uwabigize umwuga. Yasoje gukina atarigeze abona amakarita abiri y’umuhondo mu mukino umwe. Yabonye amakarita atatu atukura mu buzima bwe kuva atangiye gukina.
Uyu mukinnyi nta gikombe cya Uefa Champions League agira n’ubwo yakiniye amakipe y’ibigugu arimo Real Madrid ibitse ibi bikombe byinshi.
Ni we mukinnyi wakoze uburyo bwinshi bw’igitego muri shampiyona y’u Bwongereza mu mwaka umwe [2015/2016, Most Chances Created in a Premier League Season]. Yakoze 146, ndetse nta wundi urazikora kuva yava muri iyi shampiyona.
Ari kumwe n’u Budage, yegukanye igikombe cy’Isi mu 2014 cyabereye muri Brésil nyuma yo gutsinda Argentine ku mukino wa nyuma igitego 1-0.
Mu myaka 17 yari amaze akina nk’uwabigize umwuga, yegukanye ibikombe bya shampiyona muri Real Madrid.
- Advertisement -
Mu 2010-2011, yabaye umukinnyi muto watanze imipira myinshi ivamo ibitego ku mugabane w’i Burayi [European assist leader]. Mu 2012-2013, yabaye umukinnyi wa Gatatu utanze imipira ivamo ibitego muri shampiyona ya Éspagne.
Mu 2015-2016, Mesut Özil yabaye umukinnyi watanze imipira myinshi ivamo ibitego muri Premier League [Premier League assist leader].
Ari kumwe na Arsenal, yegukanye ibikombe bitatu by’Igihugu [FA Cup].
Özil yatangiriye gukina ku rwego rw’uwabigize umwuga mu Budage muri Schalke 04 II, Schalke 04, Werder Bremen, Real Madrid, Arsenal, Fenerbahçe na İstanbul Başakşehir.
UMUSEKE.RW