Ubuyobozi bw’Akarere ka Kamonyi buvuga ko hari inzu z’abarokotse Jenoside yakorewe Abatutsi mu 1994, zigera ku 2200 zikeneye gusanwa kuko zishobora gusenyuka.
Mu kwibuka ku nshuro ya 29 Jenoside yakorewe abatutsi mu 1994, igikorwa cyabereye mu Murenge wa Kayenzi nibwo ubuyobozi bwagarutse kuri iki kibazo cy’inzu zikeneye gusanwa.
Umuyobozi wungurije ushinzwe Imibereho myiza y’abaturage mu Karere ka Kamonyi, Uwiringira Marie Josée avuga ko mu ibarura bakoze basanze mu Karere kose, inzu zirenga 2000 z’abarokotse Jenoside zikenewe gusanwa, ndetse hakaba hari n’izigomba kubakwa bundi bushya.
Ati: “Twakoze ibarura ku bufatanye na MINUBUMWE dusanga hari abarokotse bagera ku 120 bakeneye kubakirwa kuko badafite amacumbi.”
Uwiringira avuga ko mu Ngengo y’Imali y’Akarere batabona ubushobozi bwo kubakira abarokotse inzu, bagendeye ku mubare wagaragaye mu ibarura, akavuga ko iki ari igikorwa gisaba ubufatanye n’izindi nzego harimo n’abafatanyabikorwa b’Akarere.
Cyakora uyu Muyobozi avuga ko hari ibyo Leta imaze gukora birimo kuvuza abafite indwara, no kubaha inkunga y’ingoboka ibasha kubatunga.
Perezida wa IBUKA muri uyu Murenge wa Kayenzi, Usabimana Tito avuga ko inzu zishaje cyane ari izubatswe mu mwaka wa 1996-1997 kuko benshi nta macumbi bari bafite icyo gihe.
Usabimana avuga ko batewe impungenge n’abazituyemo kuko zishaje cyane ku buryo hari zimwe zatangiye gusenyuka.
Ati: “Inzu z’abarokotse zose zishaje zakorewe ibararura turizera ko ibizavamo bizatuma imirimo yo kongera kuzisana irushaho kwihutishwa.”
- Advertisement -
Usabimana avuga ko iki kibazo cy’abafite amacumbi ashaje atari umwihariko w’abarokotse Jenoside batuye aha, kuko babisangiye n’abandi bahuje ibi bibazo.
Umunyamabanga Nshingwabikorwa w’Umurenge wa Kayenzi Mwizerwa Rafiki yabwiye UMUSEKE ko izi ari ingaruka mbi za Jenoside kuko itahitanye abantu gusa ko abayikoze basenye n’inzu abatutsi bari batuyemo.
Ati: “Izo nzu zose zishaje zubatswe kugira ngo abarokotse babone aho bakinga umusaya, ubu zirashaje.”
Mwizerwa yavuze ko ikibazo cy’abarokotse bakeneye kubakirwa kiraje ishinga Ubuyobozi bw’Igihugu kuko bwifuza ko nta Munyarwanda utura ahantu hatamuhesha agaciro.
Muri iki gikorwa cyo kwibuka ku nshuro ya 29, Jenoside yakorewe abatutsi mu Rwanda, abitabiriye uyu muhango babanje kunamira no gushyira indabo ahari ikimenyetso kigaragaza urutonde rw’amazina y’abatutsi bishwe bakabaroha mu cyobo kirekire rusange.
Mu gihe hari abarenga ibihumbi 9 bari batuye mu cyahoze ari Komini Kayenzi batawe muri Nyabarongo.
MUHIZI ELISÉE
UMUSEKE.RW/Kamonyi.
