Ikipe ya Kiyovu Sports, yatsindiye Rwamagana City muri 1/4 cy’Igikombe cy’Amahoro ihita inayisezerera.
Ni umukino watangiye Saa sita n’igice z’amanywa kuri Stade ya Muhanga.
Urucaca rwaje gukina uyu mukino, rwakoze impinduka zirimo Erisa Ssekisambu na Mugiraneza Frodouard babanje ku ntebe y’abasimbura, basimburwa na Benedata Janvier na Iradukunda Bertrand.
Rwamagana City yatangiye ihanahana neza ariko Cédric Lisele Lisombo na Nduwimana Louis Roméo ntabwo bari beza muri uyu mukino.
Uko iyi kipe ihusha ibitego, ni ko Kiyovu Sports yagendaga ikosora amakosa, byaje no gutuma ibona igitego cyatsinzwe na Muhozi Fred ku munota wa 39 ku mupira wari utakajwe na ba myugariro ba Rwamagana City.
Kubona igitego kw’iyi kipe yo ku Mumena, byasobanuraga ko yiyongereye amahirwe yo gukomeza muri 1/2 cy’Igikombe cy’Amahoro.
Iminota 45 yarangiye Urucaca ruyoboye n’igitego 1-0, ariko Rwamagana City inyuzamo igahererekanya neza.
Mu gice cya Kabiri, Mateso Jean de Dieu, yahise akora impinduka akuramo Riyad Nordien, ashyiramo Erisa Ssekisambu ukina mu busatirizi.
Ibintu byongeye kuba bibi kuri Rwamagana, ku munota wa 49 ubwo Kiyovu Sports yabonaga igitego cya Kabiri cyatsinzwe na Erisa Ssekisambu wari uhawe umupira na Serumogo Ally.
- Advertisement -
Urucaca rwakomeje gusatira ndetse rwiharira umupira, bituma rubona igitego ku manota wa 75 cyatsinzwe na Iradukunda Bertrand.
Nyuma yo kubona igitego cya Gatatu, icyari gikurikiyeho ni ukubicunga kugeza iminota 90 irangiye kandi ni byo abasore ba Mateso bakoze.
Iminota 90 yarangiye ikipe yo ku Mumena yegukanye intsinzi ku bitego 3-0, bituma isezerera Rwamagana City ku giteranyo cy’ibitego 5-3.
Urucaca ruzahura na APR FC muri 1/2 nyuma yo gusezerera Marine FC iyitsinze ibitego 6-3 mu mikino yombi.
Abakinnyi babanjemo ku mpande zombi:
Kiyovu Sports XI: Kimenyi Yves, Ndayishimiye Thierry, Nsabimana Aimable, Iracyadukunda Eric, Serumogo Ally, Benedata Janvier, Riyad Nordien, Muhozi Fred, Iradukunda Bertrand, Bigirimana Abedi, Nshimirimana Ismaël Pichu.
Rwamagana City XI: Habineza Samuel, Murangamirwa Serge, Uwumukiza Obed, Dushimumugenzi Jean, Kwibuka Shumbusho Aphrodis, Dimbumba Jordan, Tuyishimire Jean Pierre, Nicholas Kagaba, Nduwimana Louis Roméo, Cédric Lisele Lisombo, Mbanza Caleb.
UMUSEKE.RW