Kigali: Abagabo babiri bafatanywe inzoga za magendu z’agaciro karenga miliyoni 21Frw

Polisi y’u Rwanda, Ishami rishinzwe kurwanya ubucuruzi bwa magendu (ASOC), ryafatanye abantu babiri magendu y’inzoga zo mu bwoko butandukanye bwa likeri zifite agaciro ka miliyoni 21Frw.

Iyi magendu yafatiwe mu Karere ka Gasabo Ku wa Kabiri tariki 20 Kamena, 2023.

Umwe mu bafashwe ni umumotari w’imyaka 38 wafatiwe ahazwi nko ku Kisimenti mu murenge wa Remera, atwaye kuri moto amacupa 10 yo muri izo likeri.

Umugabo w’imyaka 33 na we yafatiwe mu rugo, mu kagari ka Kagugu, mu murenge wa Kinyinya, ahari ububiko bw’izo nzoga zose hamwe zifite agaciro ka miliyoni makumyabiri n’imwe n’ibihumbi magana atatu na mirongo inani na bitanu (Frw 21,385,000).

Inzoga za likeri bafatanywe zirimo izo mu bwoko bwa Camino, Veuve Cliquot, Amarula, Moet, Hennessy, Chivas, Tequila Petron, Absolute Vodka, Remy Martin, Jameson, Bailey, Cointreau, Jack Daniel, Hendricks, Black label na Courvoisier.

Umuvugizi wa Polisi mu Mujyi wa Kigali, Superintendent of Police (SP) Sylvestre Twajamahoro, yavuze ko gufatwa kw’aba bagabo byaturutse ku makuru yatanzwe n’abaturage.

Yagize ati: “Polisi yari ifite amakuru yizewe ko hari umumotari ukunda gutwara inzoga za likeri kuri moto ye azigemuriye abacuruzi mu duce dutandukanye. Abapolisi bo mu Ishami rishinzwe kurwanya magendu baje kubona uwo mumotari atwaye amacupa 10 y’izo nzoga za magendu, ubwo yari ageze ku Kisimenti bahita bamufata.”

SP Twajamahoro yakomeje agira ati: “Akimara gufatwa yavuze ko ari iz’umugabo utuye mu kagari ka Kagugu mu murenge wa Kinyinya, na we wahise afatwa nyuma y’uko abapolisi bahageze basaka mu nzu abamo bakamusangana andi macupa 295.”

Uyu mugabo wari ubitse izi nzoga za likeri yavuze ko na we azizanirwa n’umugore uzivana mu gihugu cya Repubulika iharanira Demokarasi ya Congo (RDC).

We ngo icyo yakoraga ni ukuzimugereza ku bacuruzi akoresheje abamotari babiri barimo n’uyu wafashwe, ubundi akamuhemba ibihumbi 150Frw buri kwezi.

SP Twajamahoro yashimiye uwatanze amakuru yatumye zifatwa, aburira abakomeje kwishora mu bucuruzi bwa magendu ko inzira zose n’amayeri bakoresha, Polisi igenda ibitahura ku bufatanye n’abaturage bityo ko bakwiye kubizinukwa bagakora ubucuruzi bwemewe n’amategeko.

ICYO ITEGEKO RITEGANYA

Itegeko ry’umuryango w’ibihugu byo mu Karere k’Afurika y’Iburasirazuba rinakoreshwa mu Rwanda ingingo yaryo ya 199, ivuga ko ibicuruzwa bya magendu byafashwe bitezwa cyamunara.

Imodoka yakoreshejwe muri ubwo bucuruzi bwa magendu na yo itezwa cyamunara ndetse umushoferi wayo agacibwa amande angana n’ibihumbi bitanu by’amadolari ya Amerika (US$5000).

Ingingo ya 87 y’Itegeko No. 026/2019 ryo ku wa 18/09/2019 rigena uburyo bw’isoresha, iteganya ko; umuntu wese ugambiriye kutishyura umusoro ukoze igikorwa cyo guhisha ibicuruzwa bisoreshwa cyangwa imitungo ifitanye isano n’ubucuruzi; aba akoze icyaha cyo kunyereza umusoro.

Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarengeje imyaka itanu (5).

IVOMO: RNP Website

UMUSEKE.RW