Ubunyangamugayo buke bwatumye Kandidatire ya Gacinya yangwa

Nyuma yo kujuririra icyemezo cya Komisiyo y’Amatora mu Ishyirahamwe Nyarwanda ry’Umupira w’Amaguru, Ferwafa ndetse ubujurire bwe bwahabwa umugisha, Gacinya Chance Denys yongeye kwangirwa kwiyamamariza kujya muri Komite Nyobozi nshya y’iri shyirahamwe.

Kuri uyu wa Gatatu ni bwo habaye ikiganiro n’abanyamakuru cyari kigamije gusobanura byinshi kuri kandidatire z’abifuza kuzayobora Ferwafa.

Izina ryari rihanzwe amaso, ni Gacinya Chance Denys wayoboye Rayon Sports. Uyu mugabo yimamarije umwanya wa Visi Perezida wa Kabiri ushinzwe Telinike.

N’ubwo Akanama k’Ubujurire muri Komisiyo y’Amatora ya Ferwafa kari kemeye ubujurire bwe ndetse kakavuga ko yemerewe kwiyamamaza, Komisiyo y’Amatora yo yavuze ko Gacinya atemerewe kwiyamamaza.

Biciye muri iyi Komisiyo, Ishyirahamwe Nyarwanda ry’Umupira w’Amaguru, Ferwafa, ryongeye kumwangira kwiyamamaza ku mwanya wa Visi Perezida wa Kabiri ushinzwe Tekiniki rivuga ko atujuje ubunyangamugayo.

Abandi bangiwe kwiyamamaza ni Kanamugire Fidèle uyobora Heroes FC na Murangwa Èugene Eric uyobora Ishyirahamwe ry’Abakina ruhago mu Rwanda (FAPA).

Aya matora ateganyijwe ku wa 24 Kamena 2023.

UMUSEKE.RW