Uko iminsi yicuma niko ibirego bishya byisukiranya kuri General de Police Alain Guilaume Bunyoni ufunzwe n’ubutegetsi bw’uwo barwananye urugamba kuva mu myaka ya 1990 nyuma bakaza gupfa intebe iruta izindi mu Burundi.
Gen Bunyoni yabaye Minisitiri w’Intebe kuva mu 2020 kugeza muri Nzeri 2022 ubu ari muri Gereza Nkuru ya Ngozi aho ari gukorera uburoko.
Ni umugabo wari igihangange ku butegetsi bwa Perezida Pierre Nkurunziza no mu ishyaka CNDD-FDD, ariko utarahiriwe n’ingoma ya Evariste Ndayishimiye.
Akimara kwirukanwa ku mwanya wa Minisitiri w’Intebe uruhigi rwatangiye kumugenda runono kugeza atawe muri yombi, yabanje gufungirwa iminsi myinshi mu gasho k’iperereza mbere yo koherezwa mw’ibohero.
Ku ikubitiro Gen Bunyoni yashinjwaga ibyaha bitatu ari byo guhungabanya umutekano w’igihugu, guhungabanya umutungo w’igihugu no kwiha inyungu z’akazi zitemewe n’amategeko.
Ni ibyaha ngo yakoze mu bihe bitandukanye nyuma yo kwigira igihangange kugera ubwo hari abamufataga nka Perezida, rimwe na rimwe akanatyoza mu ruhame Umukuru w’Igihugu watowe n’isinzi y’Abarundi.
Ntibyari bitangaje kuko kuva bakwinjira muri CNDD-FDD mu myaka ya 1990, Bunyoni na Ndayishimiye batigeze bumvikana.
Amakuru avuga ko no ku butegetsi bwa Perezida Nkurunziza nubwo bose babaga mu byegera bye, yahoraga abakiza kubera kutavuga rumwe.
Bivugwa ko mu gihe yari Minisitiri w’Intebe, Bunyoni hari ingingo nyinshi atavugagaho rumwe na Perezida Ndayishimiye zirimo no gusubukura umubano n’u Rwanda.
- Advertisement -
Mu kiganiro cy’abavugizi b’inzego z’igihugu mu Burundi cyabaye mu Cyumweru gishize, hatangajwe ko mu byo Gen Bunyoni ashinjwa hiyongereyemo ibindi byaha bibiri.
Ibyaha bishya byiyongereye muri dosiye ya Jenerali Bunyoni birimo gutunga intwaro adafitiye uburenganzira no gutuka Umukuru w’Igihugu.
Umunyamabanga Mukuru akaba n’Umuvugizi w’Urukiko rw’Ikirenga, Agnes Bangiricenge yavuze ko mu isakwa ryakozwe kwa Jenerali Bunyoni hasanzwe intwaro ziyongera kuzo yari yemerewe gutunga.
Ni intwaro zitavugwa ingano zasanzwe kwa Jenerali Bunyoni igihe igipolisi cyasakaga ingo ze i Bujumbura no mu Ntara ya Rutana.
Mu bisanzwe nk’umujenerali mu Burundi, yari yemerewe gutunga imbunda ebyiri zirimo into imwe n’inini imwe.
Bangiricenge yavuze ko “Iperereza riracyakomeza yaraburanye kugira ngo Urukiko rwemeze ko aburana afunzwe cyangwa ari hanze.”
Yagaragaje ko Umushinjacyaha yasabye urukiko ko yakongerwa igihe cyo gukora iperereza bijyanye n’ibindi umucamanza yari yabonye.
Ibyatangajwe n’Umunyamabanga Mukuru akaba n’Umuvugizi w’Urukiko rw’Ikirenga bigaragaza ko hakiri igihu ku rubanza rwa Jenerali Bunyoni ndetse ko mu minsi ya vuba hashobora kugaragazwa ibindi byaha bishya.
Human Rights Watch iherutse gusaba ko Jenerali Bunyoni ahabwa ubutabera bwigenga urubanza rwe rukazitabirwa n’indorerezi Mpuzamahanga.
Ku wa 21 Mata 2023, nibwo Jenerali Bunyoni yafatiwe ahitwa Nyamuzi, mu gace kitwa Mubone muri Komine ya Kabezi, mu Ntara ya Bujumbura aho yari yihishe inzego z’umutekano zamuhigaga hasi hejuru.
NDEKEZI JOHNSON / UMUSEKE.RW
