Itsinda rya Boys II Men ryibitseho ibikombe bine bya Grammy awards, birindwi bya Soul Train Music Awards, icumi bya American Music Awards n’ibindi byinshi ritegerejwe mu gitaramo cy’akataraboneka mu Mujyi wa Kigali.
Ni igitaramo kizaba ku wa 28 Ukwakira 2023 muri BK Arena nk’uko byemejwe n’abatumiye aba bahanzi bakunzwe ku rwego Mpuzamahanga.
Iki gitaramo gifite umwihariko udasanzwe kuko nta bandi bahanzi bazafatanya n’iri tsinda kugira ngo bazamare ipfa abakunzi b’umuziki uyunguruye.
Abateguye iki gitaramo ntibarashyira hanze ibiciro byo kucyinjiramo bikazamenyekana mu minsi iri imbere.
Iri tsinda ry’abagabo batatu ryavukiye muri Leta Zunze Ubumwe za Amerika. Rigizwe na Nathan Morris, Shawn Stockman na Wanya Morris, mu gihe Michael McCary na Marc Nelson barihozemo bakaza kurisezeramo.
Aba bagabo bazwi cyane mu ndirimbo z’urukundo nka ‘End of the road’, ‘One sweet day’, ‘I’ll make love to you’ n’izindi nyinshi zakoze amateka mu njyana ya R&B.
NDEKEZI JOHNSON / UMUSEKE.RW
