Ubuyobozi bwa Kiyovu Sports, bwongeye gushimangira ko iyi kipe izakoresha ingengo ibyibushye kugira ngo izabashe kugera ku ntego za yo, zo gushaka kimwe mu bikombe bikinirwa mu Rwanda.
Nyuma yo kubura igikombe cya shampiyona mu myaka ibiri ishize [2021/2022 na 2022/2023], ubuyobozi bwa Kiyovu Sports ntiburava ku izima.
Ikigaragaza ko iyi kipe inyotewe kimwe mu bikombe bikinirwa mu Rwanda, cyane cyane icya shampiyona, ni isoko iyi kipe yagiye guhahiraho mbere y’itangira ry’umwaka w’imikino.
Ikirenze kuri ibyo, ubuyobozi bwa Kiyovu Sports Ltd, bwemeje ko ingengo y’imari y’uyu mwaka muri iyi kipe, izaba ari miliyari 1 Frw, mu gihe umwaka ushize hari hateganyijwe miliyoni 850 Frw.
Mvukiyehe Juvénal uyobora Kiyovu Sports Ltd, yavuze ko kugira ngo ubashe kugera ku ntego zagutse, bisaba no gushora byinshi ku isoko.
Ati “Turateganya Ingengo y’Imari igera kuri miliyari 1 Frw. Ngira iyo mubona abakinnyi turi kugura, basaba ubushobozi buhagije. Iyo ubona nk’uyu munya-Angola, ubona ko bisaba ubushobozi. Ukurikije n’ibyo twifuza kugeraho uyu mwaka, ntabwo yajya munsi ya miliyari 1 Frw.”
Iyi kipe iherutse kwerekana abakinnyi bashya yaguze, biganjemo abanyamahanga benshi kandi bahenze yaba mu kubagura no mu mishahara bazahembwa.
Ubuyobozi bw’iyi kipe bwakomeje kuvuga ko butaracika intege zo kwiruka kuri kimwe mu bikombe bikinirwa mu Rwanda, yaba icya shampiyona cyangwa icy’Amahoro.
Mu myaka ibiri y’imikino iheruka, 2021-2022 na 2022-2023, iyi kipe yagiye ibona umwanya wa Kabiri aho hamwe yarushijwe inota rimwe na APR FC, ahandi ikarushwa ibitego.
- Advertisement -
UMUSEKE.RW
