Ku wa Gatandatu tariki 22 Nyakanga 2023, ni bwo ikipe ya Lion de Fer yashyikirijwe igikombe cya shampiyona ya 2022-2023.
Gutanga igikombe ndetse no gusoza umwaka w’imikino 2022-2023, byabereye ku kibuga cya Croix Rouge nyuma y’umukino wahuje Lion de Fer na Sharks.
Umutoza wa Lion de Fer unatoza ikipe y’Igihugu, Kamali Vincent avuga ko yagowe n’amakipe nka 1000 Hills ndetse na Muhanga Thunders.
Gusa akomeza avuga ko kugira amakipe menshi akomeye, binatuma shampiyona ikomera ikanazamura urwego.
Abajijwe ku bijyanye n’imikino ya gicuti yaba iteganywa mu kwitegura amarushanwa mpuzamahanga ku kipe ya Lion de Fer, Kamali yasubije ko iyi kipe ishobora kuzakina n’amakipe yo muri Uganda na Kenya ariko mu kwezi gutaha ikipe y’Igihugu izakina n’ikipe y’Igihugu y’u Burundi.
Umuyobozi w’Ishyirahamwe Nyarwanda ry’Umukino wa Rugby, Kamanda Tharcisse, ahamya ko shampiyona yagenze neza ndetse babyishimira.
Ati: “Uyu munsi ni bwo dusoje icyiciro cya Mbere kandi mwabonye ko abakinnyi baracyari mu bihe bya bo. Bityo kandi wari umwanya wo kureba n’uko amakipe ahagaze kuko ubu turimo gutegura umukino wa gicuti n’ikipe y’igihugu y’Abarundi.”
Uyu muyobozi, yasoje avuga ko bagiye gutegura indi mikino y’abakinnyi barindwi ndetse n’imikino mu bakiri bato.
Ati “Ntitwabura kuvuga ku mikino y’abana kuko nk’imikino y’amashuri yo mu Karere ka Afurika y’i Burasirazuba iteganyijwe kubera mu Rwanda. Birumvikana ko abo bakinnyi bagomba gukina imikino myinshi kugira ngo barusheho kwitegura FEASSSA.”
- Advertisement -
Ikipe yabaye iya mbere yashyikirijwe igikombe n’ibihumbi 500 Frw, 1000 Hills yabaye iya Kabiri ihembwa ibihumbi 300 Frw, mu gihe iya Gatatu yahembwe ibihumbi 200 Frw.
UMUSEKE.RW
