Umuyobozi w’Umuryango wa Kiyovu Sports, Ndorimana Jean François Regis uzwi nka Général, yakuye mu rujujo abakomeje gutekereza ko ikipe ya Kiyovu Sports izabaho nabi mu gihe izaba idafite Mvukiyehe Juvénal.
Ku wa Gatatu tariki ya 27 Nzeri 2023 ni bwo Komite Nyobozi y’Umuryango wa Kiyovu Sports, yatangaje ko ibikorwa byose bya Siporo bikuwe muri Kiyovu Sports Company Limited, bisubijwe mu Muryango wa Kiyovu Sports.
Impamvu zo gukora izi mpinduka zatangajwe, zirimo ko Company itigeze icunga neza ibikorwa bya Siporo by’Umuryango ndetse bigatuma ikipe ijya kwishyura amadeni y’abakinnyi birukanwe mu buryo bunyuranyije n’amategeko.
Bamwe babonye izi mpinduka, bahise bibaza uko iyi kipe yo ku mu Mumena izabaho idafite Mvukiyehe Juvénal wari umaze kuyigarurira igitinyiro.
Abibaza ibi, basubijwe na Ndorimana Jean François Regis uyobora Umuryango wa Kiyovu Sports, ubwo yari ari mu kiganiro n’abanyamakuru.
Yagize ati “Umuntu urebera Kiyovu mu ndorerwamo ya Juvénal cyangwa ya Général, afite ikibazo gikomeye.”
Ikindi cyakomeje kwibazwaho, ni uburyo Umuryango uzakorana na bamwe mu bakinnyi utagizeho uruhare mu gusinya amasezerano kwa bo, nyamara kugeza ubu bakaba ari abakozi bahoraho b’Umuryango wa Kiyovu Sports.
Ndorimana ati “Nta mukinnyi wa Juvénal, nta mukinnyi General. Abakinnyi bose ni aba Kiyovu.”
Uyu muyobozi kandi, yamaze impungenge abibaza ko ikipe abereye umuyobozi yazisanga mu madeni mu gihe Mvukiyehe yaba avuze ko afite imigabane runaka muri uyu muryango.
- Advertisement -
Ati “Nagira ibyo avuga ko ikipe imugomba, tuzifashisha umunyamategeko wacu tubimuhe. Ndakeka nta kibazo bizateza.”
Mvukiyehe Juvénal yafashe inshingano zo kuyobora Kiyovu Sports mu 2020, nyuma y’uko abanyamuryango bari bamutoreye izi nshingano yari asimbuyeho Mvuyekure François.
HABIMANA SADI/UMUSEKE.RW