Umuyobozi wa Gasogi United, Kakooza Nkuriza Charles, KNC, yiyemeje gufasha umwana witwa Iranzi Cédric uhereutse kubuzwa kujya muri Academy ya Bayern Munich kandi yari yabitsindiye.
Mu minsi ishize ni bwo humvikanye umubyeyi wo mu Karere ka Huye, watabarizaga umwana we avuga ko yarenganyijwe akimwa amahirwe yo gukina muri Academy ya Bayern Munich nyamara yari mu batoranyijwe.
Iranzi Cédric wakomeje gusiragizwa n’inzego avuga ko zirimo n’Ishyirahamwe ry’Umupira w’Amaguru mu Rwanda, Ferwafa, ubu yatangiye guhabwa ubufasha na KNC uyobora Gasogi United ndetse yahise ajyanwa ku ishuri.
Iranzi yahawe ibikoresho by’ibanze byo kumufasha gukora imyitozo, ndetse ahita ajyanwa ku ishuri rya APAER.
Uyu mwana washenguwe no kuvutswa amahirwe yo kwishyurirwa ishuri muri Academy ya Bayern Munich, avuga ko we na mushiki we babayeho ubuzima bubi ndetse kubona icyo kurya ari ikibazo, ariko yagannye ruhago ngo arebe ko yazakuramo ubuzima bwiza abifatanyije no kwiga.
HABIMANA SADI/UMUSEKE.RW